Minister-te campaign danah
invau leh inhrek lam a hawi
– Lalruatkima
Sinlung Hills Council inthlan turah ZPM sawrkara minister-te campaign dan chu invauna leh inhrek tumna lam hawi niin, democracy mit naute a khawih tih MNF hruaitu Lalruatkima chuan a sawi.
Sinlung Hills Council (SHC) inthlan campaign kharna Inrinnia neihah MNF treasurer Lalruatkima chuan SHC inthlanah party tinin campaign beihpui an thlak theuh a. Theihtawp an chhuah vek laiin, ruling party-a an hotu, minister leh MLA thenkhat thusawi duhdan chuan chaurau ek an thai emaw tih mai turin bial mipui vauna aw an chhuah chu hriatthiam a har a, a kawtawpah an tang ta mai em ni, tih chu an zawhna a ni tih a sawi.
“Minister thenkhat campaign dan hian mipui rorelna ‘democracy’ mit naute a khawih a. Inhrekna lam hawi, Aizawlah anmahni dawr tura lokalte pawh lo induh san tur ang maia thusawi hriat tur awm hi Mizoram inthlana kan la hriat ngai loh a ni,” a ti.
Sawrkar hmasa hnuaia Mizoram malsawmna dawn zozai ngaihtuahin, khawtlang, bial leh ram hmasawnna thlensaktu chu tute nge chhut ila, sawrkar kal tawhte vek an ni tih minister hlui Lalruatkima hian a sawi a. Tuna sawrkarna chelh mektuten eng hmasawnna hna mah an la thawk lo chungin, engmah tih nei lo ang maiin sawrkar kal tawhte an puh thin tih hretute vek kan ni tih a sawi.
“Thlaleh lawkah kum khat sawrkar an ni tawh dawn a, enge kum khat chhungin an thawh, enge an tih ngaihtuah ila. Sawi loh anga awm leh sawi anga awm lote hi kan hrefiah tawh a. Sinlung Council inthlanah hian vote ngam chi ah kan ngai lo a. MNF hian bial 9 chu kan lak mai kan inring hle a ni,” a ti.
An tih dik loh leh tihsual palh tam tak awmah ngaihdam an dil a. Pathian leh ram tan theihtawpa ke pen chhunzawm turin tihtak zetin mipui a sawm tih a sawi a ni.
Minister-te campaign danah invau leh inhrek lam a hawi – Lalruatkima
