Mipui Aw-a lungawilohna thlen mi 672 zingah case 613 chingfel tawh

Mipui Aw-a lungawilohna thlen mi
672 zingah case 613 chingfel tawh
Mizoram sawrkarin a hnuaia hnathawh dan phunga lungawilohna nei mi tupawhin thu an thlen theihna tura kum 2024-a a siam ‘Mipui Aw’ ah lungawilohna thlentu mi 672 an awm tawh a, heng zinga 613 chu chinfel ni tawhin, hun duh rei chi 45 chinfel loh a la awm.
Department of Personnel and Administrative Reforms hotute sawi danin, Secretariat-a administrative department zawng zawngin e-office an kalpui tawh a, department dang 9-in an hmang tawh bawk. Sawrkar department-te chu e-office hmang vek tura hriattir an ni tawh.
DP&AR hian General Service Wing, Administrative Reform Wing, Secretariat Service Wing, Civil Service Wing leh MPSC a enkawl a, sawrkar hnathawk zawng zawng viltu a ni.
MPSC hian 2025- 2026 sawrkar kum chhungin exam vawi 142 a kalpui a, result chi 57 a puang hman. DPC vawi 292 an thu bawk. Tunah department zawng zawngin hna hniam lam pawh MPSC-in la zel se an duh tawh avangin MPSC tigchaka thawktu tam zawk pekin, kawng danga sawrkar hnalakna kalpui aiin sawrkar sum senso a tlem zawk dawn a, chak taka bawhzui a tul tih sawi a ni.
DP&AR hotute hi a changtu chief minister Lalduhoma hoin Thawhlehni khan an hnathawh thlirletin an thukhawm a. Report-a tarlan danin, 2025- 2026 sawrkar kum chhung khan Adminstrative Training Institute-in training chi hrang hrang 84 a kalpui a, mi 2389 an kal. ATI hian organisedsService officer-te a huho zelin training pe tawh se, training an zawh rualin Indian Institute of Public Administration chu a huho vekin tlawh zel tawh se, an ti.
Right to Public Services Act chu online-a kalpui niin a hman theih tawh a, Right to Public Services-ah tihhlawhtlin theih service chauh dah a pawimawh tih sawi a ni.
Chief minister chuan, a mawhphurtute thukhawma hmasawnna tur thil pawimawh an sawiho chu tul a ti a. Sawrkar hna tluang takin kal se, ramin hmasawnna hmu mawlh mawlh se an duh tih sawiin, siamthat ngai siamtha turin theihtawp chhuah tlang turin a sawm tih a sawi a ni.
DP&AR commissioner & secretary Udit Prakash Rai chuan, DP&AR hnuaia Wing hrang hrang leh MPSC hnathawh dan a sawifiah a. Sawrkar hnathawkte kaisanna mumal zawka kalpui a tul dan, online hmanga sawrkar hnathawkte vilna, post ruak zat leh hnawhkhah mek awm zat endikna tur rawtna an neih a sawi a ni.