Tun hnaia Council of Ministers thukhawm chuan, sawrkar hnathawkte hlawha Dearness Allowance chu 46% atangin 50% ah a tisang a; hei hi thla leh December ni 1 atanga hman tan tur a ni.
Sawrkar hnathawkte DA a pung hi an lawmpuiawm khawp mai. Thil man hian tlakhniam lam aiin san lam a pan chho zel a, chu chuan ni tin khawsak a tiharsa ve zel a. Hetia thil man a san chhoh zel dan nena inmil tawk tura sawrkarin a hnathawkte hlawh a tipung ve zel hi, DA la pha ve lo tan pawh a thatna tam tak a awm; chu lam chu kan chhui zui rih lo ang.
Kan thupui hi a ngai kawi lui talh duh tan chuan a ‘sarcastic’ rawngkai te pawh a tih theih awm e; mahse, chu lam chu kan tum a ni lo. Sawrkar hnathawkte hlawh ang hi mipui hian hlawh an nei ve lo tih a chiang reng a, mipuiin DA lo lak ve thu lah a awm hek lo. Mahse, sawrkar hnathawkte hi mipui rawngbawltu an ni a, an hah man (hlawh) pawh mipui chhiah tlingkhawm atanga pek a ni a. An hnathawh ber chu, mipui, ram leh hnam hmasawnna leh mi harsa zawkte dinhmun dawmkan a ni. Chu hna an thawhna kawngah chuan, sawrkar hnathawkte hi dinhmun harsa taka an awm hi sawrkarin a phal lova, a duat hle a, an hlawh sum fai bakah hamthatna dang tam takin a la vur cheu zawk a ni.
Chuti taka duat hlawh sawrkar hnathawkte chuan, duat an hlawh chhan, mipui rawngbawl hna chu eng ang takin nge an thawh a, DA an dawn thin tlukpui hi mipui hnenah hian eng zat percent nge hamthatna an thawhsak ve thin tih hi inteh nan an hmang ve thin em? tih zawhna kan zawh ve nan, “Mipui Dearness Allowance ve hi le?” kan ti ve ta a ni.
A nihna takah chuan sawrkar hnathawh hi eizawnna lam ai mahin, mipui rawngbawlna lam a pawl zawk mah a; mahse, keini chuan eizawnna pui ber angin kan chhuah a, ‘sawrkar hna awmzia’ bosal thak khawpin kan buaipui ni te hian a hriat ta mah mah zawk a ni.
Chumi a lan chian em emna pakhat chu, sawrkar hnuaia department hrang hrangte hi ‘department hming’ an put chhan anga tha taka an mawhphurhna hlenchhuak thei an awm mang lo hi a ni. Entir nan, agriculture department chu buh leh bal, ei leh bara ram intodelh tura hma lak te, ram economy chawikang thei tur khawpa loneitute dinhmun dawmkan te, leh thil dang tam tak. Chutiang bawkin, AH&Vety department te, Fisheries department te, horticulture department te pawh, sa chi hrang hrang, sangha leh thlai leh thei lama state dang atanga chawkluh ngai lo tura mahni intodelh tura hna thawh, te a ni. A technical lam ni se, kawngpui tha nei tura mawhphurtu PWD te, tui leh kawlphetha hnianghnara mipui chhawpchhuahsak tur PHE leh P&E department te, hriselna leh ei leh in thianghlim mipui chhawpchhuahsak tura mawhphurtu health department te, zirna lam ni se, chhawrtlaka mihring chher chhuaktu tur education department te an awm bawk a. Heng department leh department danga thawktu zawng zawngte pawh, ram leh hnam, mipui hamthatna tura hna an thawh kawngah hian, an rawngbawlsak mipuite hamthatna tur an thawh chhuah hi eng zat percent-in nge a san chhoh ve thin? tih hi inenfiah nan hmang thei ila; tichuan, hma kan sawn phah ang a, kan lawm tlang bawk ang a, 1% GDP mission pawh kan hlenchhuak thei mahna!
Mipui Dearness Allowance ve hi le?

