Mipui tana ding thin Congress
lam hawi leh turin mipui sawm
Mizoram mipui tana ding thin Congress a sawrkar leh ngei theihnan an lam hawi leh turin Mizoram mipui a sawm tih Congress hruaitu Dr Lalmalsawma chuan a sawi.
Mamit district khaw hrang hrang a fannaah MPCC treasurer Dr Lalmalsawma Nghaka chuan Congress sawrkarin thil tha tam tak a ti a, retheihna ata mi tam tak khaichhuakin, ram tan rohlu tam tak a hnutchiah tih a sawi.
“Tuna kan ram dinhmun en hian, a bikin kuthnathawktute an mangang hle a, ZPM sawrkarin ti tura a intiam a tih loh avangin Mizoram dung leh vangah chhungkaw tam takin harsatna an tawk mek. Congress party chuan lungchhiatthlak kan ti a, rim taka hna thawk thin kan kuthnathawktute an beidawng mai ang tih kan hlau a ni,” a ti.
Congress party chuan mipui mamawh milin policy an siam zel a. Kuthnathawktuten an hman tangkai em em, 2006 February 2-a hman tan, ni 100 inhlawh (MGNREGA) chu centre-a Congress sawrkar laia duan a ni a. Congress-in mipui hmasawnnan porgramme tha tak tak a duang tawh thin a, centre-ah pawh a siamthiam an nihnaah Mizoram mil tawka siam an thiam tih mipuiin ringngam turin a ngen tih MPCC treasurer hian a sawi.
“Congress party hian lalna leh thuhneihna kan duh huam huam vang niloin, kan ram mipui, a bikin miharsa zawkte, kuthnathawktute leh a mi nawlpui dinhmun chawikang leh turin inthlanah sawrkarna kan siam ngei ngei a ngai. Mi harsa zawk, kuthnathawktute, mi naran mi nawlpui leh sawrkar hnathawk thlenga an thiantha ber Congress party lam hawi leh turin Mizoram mipui kan sawm a ni,” a ti.
Mipui tana ding thin Congress lam hawi leh turin mipui sawm
