Mipuiin Revenue department an rin ngamna turin a hma ka hruai – B Lalchhanzova

Revenue department-ah mipuiin rinna an nghah ngamna turin amahin hma a hruai a, ama pualin ram a inpe loa, thawktute pawhin a hnung zui turin a sawm tih minister B Lalchhanzova chuan a sawi.
Land Revenue & Settlement department chuan Ningani khan state level review meeting neiin hma an lak mek leh hmathlir bakah an hnathawha harsatna sutkian dan tur an sawiho a. Hmanpuitu LR&S minister chuan, ama hoa kum hnih leh a chanve an thawh chhungin thawktute tanrualna avangin mipuiin thil tha tih tum leh hmasawn tum hmuhin an department an hmu nia a hriat thu a sawi. An department laka mipuiin rinna an nghah a, rinngam an nih lantir turin amahin hma a hruai a, a pualin khawi hmunah mah ram a inpe lo tih sawiin, a thawhpuite pawh chulamah chuan a hnung zui turin a fuih.
Revenue department chu state-in ama puala sum a hmuh theihna – state own revenue source pawimawh a ni a, mipui pawhin Mizoram-in ama puala sum a thawhchhuah pawimawhna an hrethiam chho zel tih a sawi. Kum kaltaa stamps & registration bakah land tax leh non tax atanga an sum lakluh chu vaibelchhe 40.23 a tling a, a pung tha hle, tiin, heng sum hi state sawrkar ta liau liau, state mamawha hman tur a ni tih a sawi a ni.
Ram hlut dan chhutna mumal nei turin MZU Economics Department thiamna hman tangkai mek a ni a, tax pe lote chhuichhuah leh umzui hna pawh online tax payment 2.0 hmangin chak taka enzui mek a ni tih a sawi bawk.
“Mipuiin LR&S department min mamawhna a sang chho zel a, min beisei ang diak diak la thleng phak lo mah ila, rim takin hna kan thawk mek zel a ni tih min hriat sak turin ka ngen a ni,” B Lalchhanzova hian a ti.
An department chu thawktu awm thei zat zaa 50 chauh hnawhkhah ni chunga hna thawk an ni, tiin, hnathawh tur a tam bakah mipuiin mamawhna a sang a; technology nen tangkawpin, thawktute pawhin an indaihlohna hmu lian loa, mahni zawnah theihtawp chhuah turin a chah tih a sawi bawk.
“Revenue kaihhnawihah office leh in lamah min hmu an tam thin a, min hmuh tumtu an tlem hunah LR&S department-in revenue reforms kan kalpui mek hi a hlawhtling a tih ngam ang,” minister hian a ti.