Mizo National Front, Adviser Dr. R. Lalthangliana chuan MLA chhuanawm tak tak MNF-in an nei tih sawiin, an bial an vil hmeh em em vek mai chu lawmawm a tih thu a sawi a. Bial vil tha leh enkawl tha MLA an nih angin an bial theuh mipuite pawhin an MLA te duhsakna an hlan leh ngei a rin thu a sawi.
Mizo Hnam Runa chhung inkhawm neihah Dr R Lalthangliana, Adviser chuan MNF chu Pathian leh kan ram tan, titu an nih angin an dah hmasak ber tur chu Pathian a nih thu a sawi a. Pathian hre chunga hmangaihna, lainatna leh duhsakna nen an kal a nih chuan Lalpa’n sorkarna a pe leh em em ang tih sawiin, Pathian hruainaa harsatna lian tham awm lova inthlan zawh a ni ta chu lawmawm a tih thu a sawi a. Politics-a kum 30 bawr vel a lo awm ve tawh tih sawiin, tun tum MLA te anga mahni bial vil tha leh ngaihsak an la awm lo hiala a hriat thu a sawi bawk.
MNF Adviser chuan, sorkarna an chan chhungin hun khirh tak an tawk chho tih sawiin, kum 2020 chho atangin Covid hripuiin min nuai tih a sawi a. Khawvel ram ropui ber berte pawh hripui avangin an mualpho tih sawiin, kum thum leh thla hnih chhung zet sorkar pangngai lovin an kal tih a sawi a.
Sorkar, Kohhran, tlawmngai pawl leh mipuite Covid dovin an tangrual em em chu lawmawm a tih thu sawiin, Covid hripui bakah, ramri buai, kan unau raltlan te, lirnging leh vawk pul hrite avangin buaina nasa tak kan tawk tih a sawi a. Hun harsa leh khirh tak tawk chungin Pathian leh mipuite tanhona zarah mualpho em em lovin hmasawnna hna nasa takin Department hrang hrangin an thawk theite chu lawmawm a tih thu a sawi bawk.
Mipuite duhsakna chan leh ngei beisei
