Lok Sabha-a Leader of Opposition, Rahul Gandhi chuan ram pum huapa caste census neih rawt nawnin ‘Miss India pageant list’ ah pawh Dalit, Tribal emaw Other Backward Communities aiawh hmeichhia an awm ngai lo a ti.
Samvidhan Samman Sammelan a punkhawmnaa thusawina a neihah Gandhi chuan, “Miss India-a tel te list ka enfiah a, Dalit emaw tribal hmeichhia te an awm leh awm loh hriat duh ka ni a, Dalit, tribal emaw OBC hmeichhia tumah an tel ve lo” tiin a sawi.
Media-te pawh sawiselin loneitute leh labourer te ngaihsak lovah a puh a, “media te chuan dance, music, cricket, Bollywodd kaihhnawih an sawi laiin loneitute leh labourers te chungchang an sawi ngai lo,” tiin a sawi.
Congress-in sorkar a siam hunah chuan caste census neiin reservation a 50% cap chu nuai bo a ni ang a ti bawk a. “Case census neiin reservation a 50% cap kan nuai bo ang a. A hmasa berah, institution hrang hranga caste hrang hrang te awmna data kan nei hmasa ang. Reservation chungchang hi sawi a ni fo va, tihhlawhtlin a ni ngai lo,” tiin a sawi.
Narendra Modi sorkar chu tun hnaia lateral entry advertisment an tihchhuah kaihhnawihah sawisel bawkin, “Mi tumah lateral entry ah 90% i hmu ngai dawn lo tih ka sawi chiang duh a ni” tiin a sawi bawk a. INDIA alliance tena caste census neih kan ngiatna chhan chu population atanga 90% te chu skill leh talent an nei chungin enkan an nih vang a ni a ti bawk.
Caste census chu Congress leh INDIA alliance policy-making foundation a ni a ti bawk a. “BJP leader te chuan caste census neih hnuah OBC section siam a ni ang an ti a. Communities hrang hrangte list kan nei duh a ni. Kan tan chuan caste census hi census satliah a ni lo va, kan policy siamna bulthut a ni. Caste census neih satliah ringawt a tawk lo, hausakna insemzai dan pawh kan hriatfiah a ngai. Chu mai bakah bureaucracy, judiciary, media ah OBCs, Dalits te inhnamhnawih dan pawh hriatfiah ngai a ni” tiin Rahul Gandhi chuan a sawi bawk.
Miss India-ah Dalits, OBC tel lo
