Miss Universe India 2025 Manika Vishwakarma

Miss Universe India 2025 Manika Vishwakarma
Miss Universe India 2025 grand finale chu nizan hmasa khan Jaipur, Rajastan-ah neih a ni a, Rajasthan nula, Manika Vishwakarma, kum 22, chu ‘Miss’-ah thlan a ni a, Miss Universe India 2024 Rhea Singha-i’n crown a khumtir a, November thlaa Thailand-a 74th Miss Universe pageant-ah India ai a awh ang.
Miss Universe India 2025-ah hian Tanya Sharma (UP) chu Pahnihna niin, Mehak Dhingra (aryana) chu Pathumna a ni a, Amishi Kaushik chu Pathumna a ni bawk. Kumin Miss Universe India juding panel-ah hian Miss Universe India owner Nikhil Anand, actress leh Miss Universe India 2015 Urvashi Rautela, fashion designer Ashley Rebello leh filmmaker Farhad Samji te an thu
Miss Universe India 2025 Manika Vishwakarma hi Sri Ganganagar, Rajasthan chhuak, tuna Delhi a khawsa mek a ni a, Miss Universe Rajasthan 2024 a lo ni tawh bawk. Tunah ian Political Science leh Economic degree nei turin final year a bei mek a ni. Talent nei tha tak niin, classical dance a thiam viau a, painting lamah pawh duai lo tak niin, BIMSTEC Sewocon-ah India ai te pawh a lo awh zak zak tawh a, Lalit Kala Academu leh JJ School of Arts ten chawimawina an lo hlan tawh bawk a ni.
Manika hi Neuronova founder niin, he platform hi neurodivergence chungchang sawihona leh hetilama ngaihdan siamthatna tura din a ni a. An hmalaknaa hian ADHD (Attention deficit hyperactivity disorder) chu disorder anga thlir lova, cognitive strength danglam bik anga en tura inzirtirna a tel.
Finale round-ah Manika hian hmeichhia te tana zirna chawisan nge miharsa zawk te tana tanpuina pek a thlan zawk ang tih zawhna chu, hmeichhia te zirna chawisan a ngaihpawimaw zawk tur thu a chhangin, zirna chu retheihna lak atanga inkhaichhuahna kawng pawimawh zawk nia a ngaih thu sawiin, “Hmeichhia te zirna chuan mipakhat nin mai a tidanglam lo va, chhungkua, khawtlang leh ram hmalam hun a tidanglam zawk a ni,” a ti bawk.
Miss Universe India 2025 a thlan a nih hnuah Manika chuan, “Ka zinkawng hi ka seilenna khua, Ganganagar atanga intan a ni. Delhi-ah hian intihsiakna atana inpuahchah tura awm ka ni. Mahni inrintawkna leh huaisenna nei turin mahni kan infuihnawn fo a tul a. Mitinin hemi kawngah hian pawimawhna kan nei vek a ni. Vawiina ka nihna ka thlen theih nana min puitu zawng zawng chungah lawmthu ka sawi. Intihsiakna hi thil pakhat a ni satliah mai lo va, tu emaw nihna chherchhuah theihna khawvel a ni,” a ni.