Mit enkawlna lamah thawh ho rel
Larsap Dr Hari Babu Kambhampati huaihawtin LV Prasad Eye Institute, Hyderabad hotute chuan thawhho dan sawiin Health department, Zoram Medical College (ZMC), National Health Mission (NHM), Synod Hospital leh Eye Care Hospital thuneitute an kawm.
Larsap chuan India hmun hrang hranga LV Prasad Eye Institute hmalakna fakawm a tih thu a sawi a. Mizoram tana mit lam inenkawlna tha zawk pek inhuam a, Health department, sawrkar leh private hospital te nena thawhona tha neih beiseia an lokal chu thil lawmawm tak a ni tih a sawi.
Khawvel hmasawnna sang chho zelin a ken tel emaw tih turin mit lama harsatna tawk an tam tih a sawi a. A enkawlna lamah tan lak a ngai hle, tiin, Mizoramah pawh mit lama harsatna tawk tam tak an awm a, enkawlna tha kan mamawh nia a hriat thu a sawi.
LV Prasad Eye Institute founder Dr GN Rao chuan an hnathawh dan tlangpui a sawi a. Mizoram nen thawhona awm theih dan turte sawifiah a ni. Health principal secretary Esther Lalruat Kimi, ZMC director Dr John Zohmingthanga, NHM mission director Dr Eric Zomawia, Synod Hospital atangin Dr R Lalrindiki leh Eye Care Hospital neitu Dr KL Remsanga ten an hmalakna an sawi ve bawk.
Sawihona atangin, ophthalmologist, optometrist leh nurse training pek kawngah te, khawl tha zawk neih theih dan kawngah leh school naupangte hnena uar zawka an mit that dan ensak chu thawh ho theihna nia hriat a ni.
LV Prasad Eye Institute hian vawiin, April 27 hian ZMC an tlawh anga, an zirchiang dawn ni.
LV Prasad Eye Institute Hyderabad hi non-profit organization niin, kum 1987 a din a ni a, tunah hian India ramah centre 275 neiin, khawvela eye care network lian ber a ni.
Mit enkawlna lamah thawh ho rel
