Israel-ah mi sing chuang fe te chuan Hamas tena an hren an mitang te chhuah zalen an nih ngiatin punkhawmna an nei a, chutih laiin inkahhai a awm theih nan inbiakna neih mek a ni bawk.
Tel Aviv khawpuia pungkhawmte chuan ‘Indona hi a thianghlim lo, nun zawk a ni’ tia aurualin Prime Minister Benjamin Netanyahu chu Gaza buaina awhreitirah an puh bawk.
Kar kalta Inrinni khan Hamas palaite chu mediator Egypt te nen inbiakna an nei thung a. Mahse, engmah thutlukna mumal siam thei lovin Pathianni khan inbiakna neih chhunzawm a ni zui a ni.
Cairo khawpuia inkahhai a awm theih nna inbiakna hi Egypt leh Qatar hmalaknaa kalpui niin Israel-in Gaza a beihna chhunzawm lo se, mitang te Hamas ten chhuah zalen bawk se tih chu thuken ber a ni.
Mahse inhnialna awm ta leh harsatna ber chu inkahhai chu temporary nge permanent ni ang tihah a ni thung. Israel chuan ni 40 inkahhai kalpui bakah Palestinian mitang te tam tak chhuah zalen a intiam a.
Mahse Hamas leader Ismail Haniyeh thung chuan inkahhai chu permanent ni se ti thungin inremna an siam dawn a nih chuan indona tihtawp zia lantir nan Israel chu Gaza atangin a inhnukdawk vek tur a ni a ti thung.
Hetih lai hian Israeli sorkar official te chuan kar kalta Inrinnia local media-te hnenah Israel chuan mitang te chhuah zalen an nih theih nan engti kawng mahin indona tihtawp chu thleng tawnpui an remti dawn lo a ti thung a.
“IDF te chuan Rafah luhchhuahin Hamas battalion la awm chhun te chu a nuaichimit dawn. Mitangte an chhuah emaw chhuah lo emaw kan nuai chimit dawn,” tiin a sawi.
Netanyahu chu a sorkar a far-right coaltion te chuan a lo intiam tawh ang ngeiin Gaza-a Rafah khawpui chu luhchh uah ngei turin an tur ve reng thung a. Gaza-ah hian raltlan mi maktaduai 1.4 vel awm meka ngaih a ni.
Israel thiantha ber US pawhin Rafah beih tumna chu langsar takin a thlawp tha duh lo va, a chhan ber pawh civilian nunna chan an tam lutuk dawnin a ngai a, Israel chuan civilian te himna tur ruahmanna Israel chu siam turin a ti thung.
Chutih laiin Israel ram chhungah Netanyahu chuan nawrna nasa tak tawng mek rengin mitang te chhuah zalen an nih theih nana nawrna a tawn chu a nasa tial tial bawk a.
7 October, 2023 a Hamas tena Israeli mi 252 an ruk bo atangin mi 128 vel chu an la kawl anga ngaih a ni a, heng zinga 34 te chu thi tawha ngaih an ni thung.
Israel mipuite chuan Hamas tena mitang an kawl mek te chu a thiin emaw a damin emaw Israel a hruai haw ngei an ngiat a. Prime Minister Netanyahu chu inkahhai awm theih nana rawtna siam te chu ngaithutak duh lovah an puh a ni.
Minister Benny Gantz, Israel war cabinet member chuan official-in thutlukna an la siam loh thu sawiin cainet meeting neih hunah sawihona neih a ni ang a ti a. Chumi hma zawng chuan official update lo nghak mai turin ka ngen che u a ni a ti thung.
Inkahhai a awm theih nan a thla a thla inbiakna neih a ni tawh a, nikum November thla khan lung in tang inthawn nan inkahhai siam zuai a lo ni tawh thung.
Hetih lai hian United Nations’ World Food Programme hotulu ber chuan Gaza chuan tampui a tawk dawn ta tiin a sawi a. Cindy McCain chaun Gaza hmarlam harsatna chuan chhim lam pawh a thleng thuai dawn tiin a sawi bawk.
Mitâng chhuah ngiatin Israel-ah pungkhawm
