Hamas te chuan Israeli lung in tang an kawlte chu a tahtawlin an chhuah zui zel.
A thawh hnihnaah Hamas te chuan Israeli 13 chhuahin Israel pawhin Hamas lung in tang 39 a chhuah zui ve bawk a. Anni bakah hian Hamas te chuan Thai mi pali an chhuah zalen bawk.
Tang inchhuahtawnna hi karkalta Zirtawpni atanga neih tan kha niin ni li chhung kalpui a ni ang a.
Heng Israel lung in tangte hi Red Cross te kutah hlan an ni a. Inrinni khan harsatna a awm hman lek lek a. Hamas armed wing Qassam Brigades te chuan northern Gaza a tanpuina thawn luh bakah Palestinian lung in tang chhuah tura thlan danah Israel in inremna a bawhchhia an ti a, hei hi Israel chuan a pha thung.
Hamas thupuangtu Osama Hamdan chuan Gaza panin truck 340 a lut tawh a, heng zinga northern Gaza thleng chu 65 chauh an la ni a ti a, chu chu Israel-in a pawmsak zahve pawh a pha lo tiin sawi a. Israel chuan northern Gaza chu indona hmun a ni a, tanpuina thawnluh chu UN mawhphurhna a ni a ti ve thung.
A hnu lawkah erawh Qatar hmalakna in inbiakna hmanhmawh-thlak taka neih zui niin inremna siam thar lehin a awm thei thung.
Hamas te chuan inkahhai a awm theih nana Egypt leh Qatar hmalaknaah pawmawm an tih thu sawiin an fak zui bawk.
Inremna ang chuan Israel mitang 50 te hmeichhia leh naupang te chu ni li chhungin Hamas ten an chhuah ang a, Israel pawhin Palestinian lng in tang 150 a chhuah ve bawk ang tih a ni.
Israel sorkar chuan inkahhaina chu ni tin Israeli 10 te chhuah a nih chuan neih chhunzawm reng theih a ni a ti a. Mahse, Hamas te chu a nuaichimit dawn tho tho a ti thung.
Hamas te hian 7 October a southern Israel an run thut khan mi 240 lai an man a, mi 1,200 chuang an tihlum bawk a ni.
Hamas te hi Iran thlawp niin Israel, UK leh US te pawhin terrorist organisation a tih te an ni a.
Israel-in a beihlet hnuah Hamas te chuan nunna chan 15,000 chuang an awm tawh tiin an sawi a. Eitur leh tuithianghlim te mamawh takzetin a awm tawh tiin an sawi bawk.
Inrinni khan central Tel Aviv ah mi 50,000 chuangin kawngzawhna neiin mitang te chu hruai haw vek turin Israel sorkar an phut a ni.
Mitangte inthleng tawn zui zel
