Tunhnaiah Arab ram (Middle East) a inchhung hna thawk tura kal Mizo hmeichhiate zingah harsatna tawk an awm tak fo avangin Mizoram State Women Commission chuan hma a lo la tawh a, tunah BJP Mizoram Pradesh pawhin hma an lakpui mek. The Aizawl Post zawhna chhangin Mizoram State Women Commission chairman Lallawmchhungi chuan, ram danga Mizo nula hnathawka kal, agency rintlak loh avanga harsatna tawk mekte chhanchhuah an nih theih nan Mizoram Police hotute leh Aizawl district bawrhsap chu hma la turin an lo hriattir tawh tih a sawi a. An ni bakah hian Mizoram MP pahnih pawh hmuin, sawrkar laipui Ministry of External Affairs-ah leh Embassy-ah te hma lakpui turin an ngen tih a sawi a ni.
BJP Mizoram Pradesh thupuangtu Lalremsangi Fanai pawhin, ram dang, a bikin Arab rama inchhung hna thawk tura kal Mizo hmeichhia harsatna tawkte tan hma la tih a sawi a. A tawp thlenga hma an lak tur thu leh sum engzat pawh insen an huam tih a sawi.
National party an nih angin, hetiang thil a thlen hian pun an ni fo thin tih a sawi a. Harsatna tawk mek an hnena in report tawh mi 20 vel an awm tih sawiin, heng mite hi a tlangpuiin thingtlang lam mi, Aizawla agency hrang hrang pali tirh thlak an ni a. Agency-te hian an mi tirhte passport leh hlawh hlawh turte an laksak vek thin tih a sawi. Agency-te lakah hian FIR an thehlut dawn tih a sawi bawk.
Mizote harsatna tawh tamna ram, Dubai-a Mizo Welfare hruaitute pawhin hetiang mi hi an lo buaipui fo tih sawiin, hnathawk tura kal tawh lo tura Mizo thalaite an ngen fo thu te, tuna harsatna tawk mekte ngei pawhin a hreawm zia hriain tumah kal tawh lo se an duh thu an sawi thu te Lalremsanga Fanai hian a sawi a ni.
Harsatna tawkten anmahni pui tura BJP Mizoram hi an ngen thin angin, a tul dan zelin sawrkar laipuia Home ministry, External Affairs ministry, India Embassy, Mizoram sawrkar thuneitute hnenah thlenin, tanpui theih dan an zawng thin tih a sawi a. India sawrkar, Mizoram sawrkar, party leh mimal zarah engemawzat chu dam taka Mizorama an lo kir leh tawh thu sawiin, tuna harsatna tawk tam takte pawh an lo haw theih ngei a beisei avangin anmahni leh an chhungte chu thlamuang taka awm turin a ngen tih a sawi. State pawn leh ram pawna hnathawk tura kal dawnin fimkhur turin mipui a ngen tih a sawi bawk.
Mizo hmeichhia Arab rama harsatna tawk tan chechhuak
