Tun tum MLA inthlan chu Mizo nationalism leh lal hrim hrim chakte inbeihna a ni tih MNF party chuan an sawi.
MNF Media & Publicity general secretary VL Krosshnehzova chuan, MLA inthlan campaign-ah Mizo nationalism leh lal hrim hrim chaka tuihalte inbeihna boruak a lian berah an ngai tih a sawi a. ZPM-in a thuammawi nan kalphung thar, mipui sawrkar tiin, sawimawi tum mah se, lal hrim hrim chakna avanga tuihal aw chauh ni ah an ngai tih a sawi. “An kalphung thar zawrh mek hi an MLA neihchhun leh independent MLA 5, dan kalha hun rei tak MLA nihna chelha bang ta te khawsak phungah a lang vek a, an intiam anga awm lo leh an insawi loh ang zela khawsa an ni a, mipuia an inzawrhna thu tha tinreng hi anmahni ngeiin an bawhchhiat tawhte a ni,” a ti.
MNF sawrkar chuan kalphung nghet, Mizo nationalism kalsan loin ram, hnam leh sakhua a dah pawimawh ngar ngar a; chutiang himna tiderthawng thei zawnga hmalakna awm chu su zelin, a do thin tih a sawi. Mizo nationalism chu eng dang maha thleng an remti ngai dawn lo, tiin, “Hnam himna chu inpumkhat tlat a ni a, Zofa hmun tina awmte huikhawm zawng leh an thlavang hauhin MNF chu a pen ngat ngat a; Pathian leh mipui duhsakna hmangin chakna kan chan leh ngei kan ring,” a ti.
Mizote sakhaw himna kawngah ringlomiten an thil tihtheihna hmanga an nekchep tawlh tawlhna karah MNF chu huai takin a dingnghet tlat zel tih MNF general secretary hian a sawi a. Sawrkar laipuia an thawhpuite ngei pawh do a tul chuan a do mai zel a, zu chungchangah pawh kohhran duhdan angin huai takin sum tam tak hloh huamin MNF sawrkar chu a pen a, kohhrante duhdan ngaichang zelin a kal zel dawn tih a sawi a ni.
BJP-in sum hmangin miretheite retheihna remchanga hmangin an thlem mek nia sawiin, an tana hnawk ber MNF chu an bei ngar ngar tih a sawi. BJP thil tawktarh chu rinna kawnga ke penna tiderthawngtu lian tak a nih dawn avangin BJP candidate leh an puanhnuai thurualpui ZPM chu hnawl ngam tur leh Mizo nationalim rilru pu chunga MNF candidate-te vote turin mipui an sawm tih a sawi
Mizo nationalism leh lal hrim hrim chak inbeihna – MNF
