Mizorama chi bil leh hnam peng hrang hrang awm chu Mizo kan nihna in min phuarkhawm zel se a duh tih District Council & Minority Affairs minister C Lalsawivunga chuan a sawi.
Pang Zirlai Pawl Joint Headquarters Aizawl buatsaih an pawla zirlai tharte lawmluh leh zirlai tithate lawmpuina chu Inrinnia Aizawla neih a hmanpuinaah C Lalsawivunga chuan, Mizorama chi bil leh hnam peng hrang hrang awmte chu Mizo kan nihnain min phuarkhawm zel se a duh tih sawiin, “In la hrang tham leh inen hrang tham kan awm loa, hetia inpumkhat leh lungrual taka kan chenho hian hnama chhiar tham leh hnam zahawm kan nih phah a ni,” a ti.
Hnam anga kan din chhuah theihnan inunauna leh inpumkhatna dah pawimawh a tul tih a sawi a. Mahni awmna hmun theuhah ram leh hnam chhanna atan theihtawp chhuaha rinawm leh huaisen taka hmalak a tul tih a sawi bawk.
Hnathawh hreh nei lo tur leh thawk loa awlsam taka sum lakluh tum lo turin minister hian a fuih a. Mahni zawn theuhah taima leh rim taka thawk tur leh a thlawna dawn leh sem ringawt beisei lo turin a chah. Zirna chu hmasawnna rahbi pawimawh tak a ni, tiin, zirlaite chu ram leh hnam tan a ni tih hria a, thiamna tak tak nei tura lehkha zir a, central service-ah a tam zawk inziaktling theia tan la turin a chah a ni.
Mizoram Youth Commission chairman Malsawmzuala pawhin a hmanpui a. MZP, MSU leh hnampual hrang hrang – LSA, MBSA, MSO, HSA, RSU leh SSPP hruaituten an hmanpui bawk.
Mizo nihna in min phuarkhawm zel se – C Lalsawivunga
