Mizo nun zia leh khawsak phung zahthiam turin tourist kan beisei – MZP

Mizo nun zia leh khawsak phung
zahthiam turin tourist kan beisei – MZP
Mizo Zirlai Pawl chuan Mizoram tlawhtu tourist pung mekah khualpang zin leh thildanga rawn tlawhtuten thil an hriat ngai leh an fimkhurna tur awm nia hria in, Mizo nunzia leh khawsak phung ngaipawimawha zahtiam turin an beisei tih an sawi.
MZP Gen. Hqrs. thuchhuak chuan, Mizoram tlawhtu hnamdang tourist-ten social media leh thil danga thehdarh tur digital content an siamin Mizo hnam, sakhua leh khawtlang timualpho thei siam lo turin a chah tih a sawi a. Mimal in leh biak inah video emaw thlalak pangngai emaw pawh nise, phalna nei lo chuan pawng lak mai mai loa, Mizoram la rawn tlawh zel turte pawhin Mizo an hmuh dan a dik lo zawnga a hruai theihna thilah phei chuan fimkhur hle turin a hriattir tih a sawi.
‘Mipui nawlpui awm dan leh nunphung pangngai aia uchuakin khawiah pawh awm lo turin kan ngen a. A bikin sakhaw hmun leh biak in zah a, Mizo hnam leh nunzia zahin, Mizo mipui mit tikham lo zawnga awm turin khualzinte kan chah a ni,’ a ti.
Hmeichhia leh hmeichhe naupangte an thla emaw video emaw la a, mi ngaihdan hruaikawi thei tur zawnga pholan chu MZP chuan a duh lo a. Hmuh remchan apiang kawm a, Mizo chanchin a hluhlang zawng leh kimchang lo thehdarh zui a remti lo tih sawiin, Mizo chanchin ngaihven leh hrechiang duh chuan thil hre ziktluak leh puitling deuh atanga ngaihven hram hram turin khualzinte a ngen tih a sawi a ni.
‘Mizoten hmeichhia leh naupange kan humhalh a, an laka nungchang mawi lo taka lantirtute chu kan enliam mai mai dawn loa, a tul dan ang zelin khawtlang angin emaw dan hmangin emaw hma kan la zel dawn,’ MZP chuan a ti.
Mizoram tlawhtute chuan hei hi a hrereng a, vantlang mithmuha mawi lo leh mit tikham zawnga awm lo turin an chah tih a sawi a. Tu pawh, eng hnathawk mi pawh Mizoramah chuan kan inzahtawn tih sawiin, taxi/ two wheeler taxi driver leh service provider tu pawh zahpah lo taka tih mai mai chu MZP chuan a remti lo tih a sawi.
‘Mizoram-a chengte hian khawsak ho leh nun dan mawi danglam tak kan nei a, mite hmuh atan kan chhuang hle. Min rawn tlawh pawp a, kan ram leilung mawi leh boruak thianghlim rawn chhim duh tan kan rilru zau takin a inhawng a. Mikhual duat leh zah hnam pawh kan ni a, tourism lama sawrkar hmalakna MZP chuan a thlawp hle. Mahse, mikhual laka that kan chhuahna leh mikhual kan lawm viau avanga hian min zuam phah tur a ni lo,’ thuchhuah chuan a ti.
Mizoram rawn tlawh tur reng rengin inner line permit (ILP) nei ngei tura chahin, temporary ILP chu awlsam taka lak theih a ni tih a sawi a. Chutihrualin, hei hi sumdawn phalna emaw hnathawka inhlawh phalna emaw a ni lo tih hria a, Mizoram tlawhtu chuan ILP ngaipawimawh turin a chah tih a sawi bawk.