Mizo palian champion nih tuma inbeihna a hraw dawn

Mizo palian champion nih tuma inbeihna a hraw dawn
Inter District Wrestling Championship vawisarihna rualin Mizoram Inchai Title Fight-a inlan tur zawn a ni nghal dawn a, ngaihven hlawh palian title chuh tumin mi pali an tel dawn.
Nimin chawhma khan LPS Arena, Falkland-ah championship hawn a ni a; district hrang 11 atangin pasarih an inelna dawn a, greco-roman leh freestyle inchaia tel turin wrestler 148 an inbuk. A hawnna atanga a kharna thlengin inchai zawng zawng LPS 10-ah live-in pekchhuah a ni ang.
District hrang zingah championship thleng-tu Aizawlin wrestler ngah berin, inchai chak mi 58 an tel a, Saitual (23), Kolasib leh Serchhip (20 ve vein) dawtin, Mamit (16), Lunglei (9) leh Champhai (2)-te chu wrestler thehchhuak ve dang an ni.
Anni bakah hian Mizo inchai champion lai cho thei tur zawn nghal a ni dawn.
Palian champion Lalsangliana chuan kum 2014 khan Lalnunfela kut atangin title a chhuhsak a, kum 10 chuang champion kawnghren a hreng tawh. November 2022 khan Fela’n hnehlet tumin bei mah se 20-0-in Sangliana a chak leh a, chu chu tun thlenga Lalsangliana inchai hnuhnunber a ni nghal.
Tun tum hian champion hlui Fela a tel dawn loh avangin kum 33 mi Sangliana lalthutthleng phehchim tumin mi thar an rawn chhuak dawn.
North Vanlaiphai inchai chak Lalrinchhana Sailo bakah Zobawk, Lunglei atangin Lalremtluanga, Rehoboth Laldinthara (Zokhawthar) leh Serchhip tlangval Raymond Lalthansangate an inel dawn a, an zinga chak ber hi a vawikhatna’n Mizo Palian Inchai title fight-ah inlanin, Upper Republic chhuanvawr an hmachhawn ang.
Paihawl champion lai Remruatpuia (Bethlehem Vengthlang, Saitual) chai tumin Ngursangzuala (Saitual), Vanlaldingngheta (Khatla) leh Vanlallawma (Muallungthu) an inel ve thung dawn a ni.
Saitual tlangval Lalawmpuia’n Pate title kawl mekin, Kolasib inchai chak pathum – Lalhruaitluanga, John Lalremmawia leh Lalnunpuia bakah, Lalchhanhima (Saitual), Jacob Vanlalrinliana (Venghlui), Nazareth Lalthazuala (Zema-bawk), Lalhmangaihzuala (Republic Veng) leh Lalawmpuia (Bulfekzawk) an inel dawn.
Nulian champion Hmangaihsangi cho tur zawnnaah Zodinpuii (Lunglei) leh Lalsiamthari (East Lungdar) an inziaklut ve bawk.
Nulaihawl champion Elizabeth Rohlupuii chai tumin Pentecost Lawmsangpuii (Champhai) a inbuatsaih bakah Nute champion Lalvenhimi chaitu nih tumin Veronica Lalbeiseii (Tachhip) leh Laltluangpuii (Kolasib) an inbuan ang.