Mizoten fak an hlawhna healthcare sector-ah ram chhung leh pawnah hnathawh tur tam tak a awm tih larsap Dr Hari Babu Kambhampati chuan a sawi.
Mission Foundation Movement (MFM) Durtlang hnuaia kum upate enkawl lam hna (geriatric caregivers) zirchhuakte tan anmahni hmun MFM Villa Durtlangah Zirtawpni khan Graduation Day hman a ni a. He hun hmanpuitu larsap chuan MFM-in hna tamna sector hrang hranga thiamna tangkai zirtir kawnga Mizo thalaite tan hna a thawh chu thil lawmawm a ni, tiin, “Ram changkang zawkah kum upa lam an tam chho zel a, kum upate enkawlna kawngah hnathawh tur a pung chak a, hei hi India hmarchhak thalaite leh a bikin Mizo thalai, hawihhawm leh themthiam tak tak ten an thiamsa leh tlem training neih hnua awlsam taka an thawh theih a ni. Japan, Malaysia, Singapore leh hmundangah he hna hi mamawhna a sang tawh hle,” a ti.
Mizo thalai zingah nurse leh healthcare professional hna thawka hmun hrang hranga awmte an pung zel a. Mizo thalaite hian an hnathawhna hmunah fak an hlawh a, ram pawnah leh India ram chhungah Mizo thalaite tan healthcare sector-ah hlawh tha tak neiin hnathawh tur tam tak a awm tih larsap hian a sawi a. Sawrkar hna a tlem avangin mi zawng zawng tan sawrkarah hnathawh tur a awm tam tawk si loa, hetiang lamah hian thalaiten hnathawh an intihhmuh a hun hle tih a sawi.
Thla thum course zirchhuak, caregiver training batch hmasa ber mi 25 hnenah certificate hlan an ni.
Mizo thalaite tan healthcare sector ah hna a tam – Larsap
