Nimin, July ni 15, chhun khan Zachhingpuii, kum 82, lehkabu ziah ‘Mizo Vangkhaw Mawitu’ tih chu tlangzarh a ni a, Zachhingpuii hian tunhmain lehkhabu a la ziak ngai lova, a kum 82 tlin champhaah a lehkhabu hmasaber hi tlangzarhin, Mizo zingah lehkhabu hmasa ber tlangzarhah chuan a upa ber a ni hial awm e.
Zachhingpuii hian a u R Chaldailova, kum 96, nen an naupan lai atanga an thil tawn hriat, Mizo thil chi hrang hrang a lehkhabuah hian a tarlang a, zirlaite puitu atan pawh tha tak tur a ni a, Mizo thalai ten pi leh pu te hunlaia kan thil neih leh thil hming chi hrang hrang kan hriat tawh loh te inhrilh hriat thar leh nana lehkha tangkai tak a nih a rinawm.
A bu chhungah hian Zopa In Sak a thil pawimawh hrang hrang te, Zo pa in chhung awm dan, mizo rimawi chi hrang hrang, mizoin ruah leh thli chi hrang hrang kan neih te, chhum chi hrang hrang leh hmanlai pioute arsi hmingphuah chi hrang hrang te bakah Mizo mipa leh hmeichhe Naupang infiamna chi hrang hrang leh pawnto hlate pawh dah tel a ni.
Zachhingpuii chuan, “Kan mithiamten lehkabu tha tak tak, ngaihnawm tak tak, bengvarthlak tak tak an ziak teuh tawh a. An kal kân, an la ziah ngai loh ni a ka hriat hmanlai kan mizo pi leh pute chenna in leh a chhunga rumrawk te, mizo naupang infiam dan chi hrang hrang, inhnawka a indawt dan te, inbaha a indawt dan te kan theihnghilh mai dawnin ka hria a. Tin, rimawi pawh hi kan pi pute khan an lo ngah khawp mai a; Tin, pawnto hla hrang hrang te pawh kan theihnghilhin a thamral mai mai ang tih hlauhna nen he lehkhabu hi buatsaih a ni,” a ti.
‘Mizo Vangkhaw Mawitu’ lehkhabu tlangzarh
