Delhi-a cham mek Mizo Zirlai Pawl president H Lalthianghlima chuan Thawhtanni khan Union Minister of State for Minority Affairs John Barla chu a chenna inah hmuin Mizo zirlaite tana thil pawimawh hrang hrang a thlen.
MZP Gen. Hqrs. president hi Rajya Sabha MP K Vanlalvena’n a kalpui a. MoS Minority Affairs hnenah hian Mizo zirlai, khawsak harsatna avanga zirna sang zawk chhunzawm thei lo an tam thu a thlen a, zirlaite hostel tam zawk Mizoramah kan mamawh tih a thlen. PMJVK Scheme kaltlanga nasa zawka zirlaite harsatna sukiang tura pui turin a ngen a, hemi kawngah hian MZP pawhin theihtawp chhuaha zirlaite tan hma an lak thin thu hrilhin, theihtawp chhuahpui chhunzawm zel turin a ngen.
Mizo zirlaite thiamna leh theihna haichhuah a nih zel theihna tur leh zirnaa hma an sawn theih nan an harsatnae sutkian nan hma la turin Union Minister of State hi MZP president hian a ngen a ni.
Rajya Sabha MP pawhin zirlaiten hostel an mamawh nasat thu leh MZP-in zirlaite harsatna hrang hrang a buaipui thin thu Union MoS hnenah hian a thlen a ni.
MZP president hi NGO Coordination Committee hminga Mizoram inthlanpui vote chhiar hun sawn tura Election Commission of India dawr tum zingah telin tunah hian Delhi-ah an cham mek a ni.
Mizo zirlaite mamawh thlen
