MIZOFED (Mizoram State Cooperative Marketing & Consumers’ Federation Limited) chuan anmahni sum thawhchhuah hmangin Electric Veng Lungleiah an luah tur building an sa zo a, Thawhlehni khan minister Lalrinpuii’n a hawng.
Minister chuan Mizote chu thil tih ho nuam ti chi, feh kawng, tui chawina leh thing phurhna thlenga thiante nena inlawm thin kan nih angin, kan mizia leh cooperative society chu a inhmeh hle tih a sawi a. Cooperative society chuan Mizoramah zung a kaih thuk hle tih sawiin, khaw tin veng tin deuh thawah society dawr din a ni a, khaw tam takah mipui tana dawr hlawhtling tak a ni tih a sawi.
Mizoramah kum 1981 atanga state pum huap cooperative society hlawhtling tak MIZOFED din chu, mipui mimirin man tlawma thil zawrhna leh a hlawma thil lak tlawm theihna tia an hriat thin a ni tih a sawi a. Thil lem leh quality tha lo zawrh a ni ngai loa, chu hmingthatna chu vawngnung reng turin thawktute pawh a chah tih a sawi a ni.
Lungleia MIZOFED building sakna atan hian cheng nuai 80 ruahman a ni a, Cascade Architecture & Engineering Zotlang Aizawl (Northpoint Consultancy) in a sa. 2025 March 1 khan hna tanin, thla 12 leh ni 2 chhunga sak zawh a ni. MIZOFED sum thawh chhuah atanga sak a ni.
MIZOFED-in an sum thawhchhuah hmangin an awmna tur building sa
