Mizoram sawrkar chuan kuthnathawktute buh tharchhuah Quintal 1822 a lei tawh.
Hemi chungchang hi nimina District Agriculture Marketing Committee (DAMC) Kolasib District thutkhawmnaah tarlan a ni a. Kum 2025 chhung khan buh quintal 1472 leh, kumin 2026-ah quintal 350 lei a ni a. Buhhum hi lei chhunzawm zel tum a ni.
Nimina DAMC meeting-ah hian, Robert C. Lalhmangaiha D.C chuan, Kolasib chu agriculture potential area a nih avangin, loneitute hmasawnna atan tha thlah lo turin kalkhawm te a sawm a, Kolasib district-ah lo neih lam kaihhnawihah tan lak thar a pawimawh tih a sawi bawk.
Kolasib district-ah hian kuthnathawktu te sawhthing leh hmunphiah leina hmun tur, Khaw tinah Primary collection centre ruahman a nih thu te, primary collection centre ten an dahkhawmna tur Secondary Collection Centre (SCC) Thingdawl, Saipum leh Vairengte ah te siam a nih thu te leh, Secondary collection centre atang hian a leitu tur te hnenah hralhchhuah leh a nih tur thu te tarlan a ni bawk.
Sorkar ruahmanna angin kumin February ni 2 atanga May ni 30 thleng Kolasib district-ah sawhthing leh hmunphiah lei a ni dawn a, Primary Society member te tharchhuahah chauh leh SCC-a an lak theih hun chhunga hralh te chauh sorkarin price support a pe dawn a. Hmunphiah ro chu grade thliar lovin Kg1 Rs 80/- in ZOHANDCO in an lei ang a, hmun danga hralh duh zawk an awm pawhin kuthnathawktu ten an duh duhna hmunah an hralh thei dawn a ni.
Mizoram buh thar Qntl 1822 lei tawh
