Mizoram chhunga lei dawh
mek Assam lamin tihtawp tir
Mizoram huamchhunga sawrkar puihnaa lei dawh mek chu Assam Police leh Forest lamin an tihtawp tir hnu ah Hailakandi bawrhsap chuan thawk zui lo turin ‘stay order’ a tichhuak zui tih sawi a ni.
MZP Gen. Hqrs sawi danin, Kolasib district Buhchangphai khawchhung Chhimlung lui, Ramthar Zau panna lei a that tawk loh avangin Mizoram sawrkar chuan Minor Irrigation hnuaiah RCC lei a siam a. Chhimluang lui lehlamah hian Buhchangphai khawmiten huan lo ram neiin, ei leh bar zawnnan an hmang. Heng huan lo ram hi Mizoram Land Revenue & Settlement department hnuaia LSC nei niin, chhiah pawh Mizoram sawrkarah an pe. Buhchangphai Village Council ram pass nei engemawzat an awm bawk.
Heng huan neitute mamawh lei dawh that mek hi Assam Police leh Assam Forest chuan tunkar Nilaini khan an tlawh a. Assam ram chhung nia sawiin, hnathawh mek hi tawpsan nghal tura an hriattir bakah Assam Hailakandi DC chuan ‘stay order’ a chhuah a ni.
He thil thleng hi MZP chuan an hriat veleh Ningani khan a hmunah an tlawh a. Buhchangphai VC-te nen thil thlen dan an sawiho. MZP chuan Mizoram chhunga Assam lamin thuneih an rawn tum fo chu hriatthiam har a tih thu sawiin, ram humhalh turin theihtawpa dodal zel nise an ti.
Mizoram sawrkarin Mizoram ramri dep khuate hmasawnna hna a thawk chu lawmawm a tih rualin, hetianga state dangin ramri an rawn nekna hi na taka chhanglet zel turin a ngen tih a sawi a. Ramri dep khuaa hmasawnna hnathawh leh hmalaknaah khawthlang hruaitute hriattirin thawhpui thin se a duh tih a sawi bawk.
MZP chuan Buhchangphai Chhimluang Ramthar kaia lei dawh mek chu a rang thei ang bera dawh zawh a nih theihnan hma a la dawn tih sawiin, sawrkar hmalakna pawh a thlithlai zui zel dawn tih a sawi a ni.
Mizoram chhunga lei dawh mek Assam lamin tihtawp tir
