Mizoram duh lohvah inngai

Zampui tlanga Phuldungsei chu Mizoram leh Tripura-in kan state huam chhunga mi an ti ve ve a, tharum hmang chuan an inchuh lo, ngawi rengin an inchuh \hin. Phuldungsei-ah hian state pahnihte hian hna an thawk ve ve a, a mi chengte pawh an mi-ah an chhiar ve ve thin. Tun hnaiah Mizoram sorkarin he khuaa mi engemaw zat chu ration card atangin a paih a, a khaw mite chuan Mizoramin anmahni leh an khua hi an duh lovah an ngai.
Phuldungsei atanga thu dawn danin, Mizoram ration card neite’n June thla ration buhfai an lak dawnin retailer-in an hming a awm tawh loh thu an lo hrilh a, VC te’n department lam an zawhin aadhar nen in link lo a ni ang tiin an lo chhang. A chhan hre lovin mak tiin an awm a, an hming paih a nih thu hi tun hnaiah an hre chiang ta a ni.
He khua hi state pahnihin an state chhunga mi-ah an chhal ve ve avangin electoral roll-ah pawh state pahnihah an awm kawp fur a, ration card pawh state pahnihah an nei kawp fur.
Phuldungsei leh a chhehvel hi pi leh pute atanga Zofate ram ni mah se Tripura sorkar hnuaiah rin luh an ni a, Phuldungsei pawh hi Tripura huam chhunga mi-a ngaih reng niin, Tripura sorkarin a enkawl reng thin.
2009 vel atang khan Mizoramin zawi zawiin hma a la a, chhungkaw 60-in NLUP tanpuina pawh an dawng. 2019-ah Mizoram sorkarin VC a din a, VC hran nei, Mamit district hnuaia mi-ah chhiar an ni ta a ni.
Phuldungsei chhuah lam chu Mizoramah ngaih a ni ta a, tlak lam chu Tripura-ah ngaih a ni ta a ni. Mahse an inpawlh tho a, Mizoram enkawl VC president pawh tlak lama mi an nih chang a awm.
Mizoram electoral roll-ah thun luh an ni a, voter 200 chuang an awm. Ni za inhlawhnaah pawh Mizoramin a huam bawk. ZPM, MNF leh Congress party, Aizawl atanga enkawl an awm a, YMA, MHIP leh MUP an awm bawk. In 180 vel an ni.
Tripura lam pawh an awm mai mai lo a, a mi cheng engemaw zat chu electoral roll, ration card leh thil dangah state pahnihah an awm kawp mek. Chutiang a nih laiin Mizoram sorkarin mi engemaw zat chu ration card atangin an hming a thai chhia a, chhungkuaa thai chhiat 13 an awm bakah, chhungkaw khata hming thenkhat thai chhiat an awm bawk. Hming thai chhiat hi mi 85 an ni.
“Kum 15 chuang Mizoram mi kan lo nih ve tawhna hi Mizoram sorkarin a pawm lo tihna a ni. Mizoram hian an mi atan min duh lo a, kan khua pawh an duh lo tihnaah kan ngai,” tiin Phuldungsei pa pakhat, a hming tarlan duh lo chuan The Aizawl Post a hrilh a, “Ration card atanga min paih hi, Tripura lam chuan kut an beng ring khawp ang,” a ti bawk.
Social media lamah ration card atanga paih an nih thu a darh a, chumi hnuah Mizoram sorkarin buhfai ei tur hi chu pek a tum leh si tih thawm an hriat thu a sawi a, “Buhfai kan duh a ni lo, ration card a ni kan duh, chu chu Mizoram mi kan ni tih finfiah nan kan duh. Buhfai te chu lo nei lo pawh ni ila Assam leh state dang pawhin min pe thei mai ang chu,” a ti.
2019-a VC an inthlan dawn khan thawm dim takin an inthlang tih an sawi a, Tripura lam an ralkhel ang a, an inthlan theih loh phah ang tih an hlauh avangin campaign ngai lo turin seat pawh an siam rem tih an sawi. Chuti chung chuan an chhehvela hnam dangte’n an complain nasa a, social media-ah pawh Mizoramin Tripura-ah inthlan a buatsaih tiin thu an thehdarh nasa tih an sawi.
“Roll pahniha awm kan awm a, ration card pawh nei kawp kan awm. Kan bul vela hnam dang hian min hek nasa a, mahse Tripura lam chuan min paih hi an duh lo,” Phuldungsei pa pakhat chuan a ti a, “Engtikah nge Mizoram hian police station a rawn dah ang tih kan thlir laiin ration card-a kan hming an thai chhe ta a nih hi,” a ti bawk.
Tripura lamah Phuldungsei bialtu MLA-in Mizoram ration card neite hming hi Tripura ration card atanga paih turin thu a lo pe tawh a, mahse Kanchanpur Sub Division supply advisory committee-in hei hi an remti lo.
Phuldungsei atanga thu dawn danin, Tripura lama heng lai vel bialtu MLA hi Tuikuk a ni a, heng lai vela cheng Tuikuk-te’n Mizote an hek avanga an MLA hian hetianga rel hi a ni. Mahse an MLA telna committee-ah a tlang ta lo a ni.
2021-ah khan, Covid-19 hrilen laiin Thaidawr tlangah Mizoram sorkarin mi panga aia tam awmkhawm a lo khap tawh a, Thaidawr tlang hi an state-a tlang sang berah an chhal avangin Tripura lam chuan hei hi an ngai thutak hle.
“Thaidawr tlangah CrPC 144 an puang te kha kan lawm a, Tripura lamin an la chang a nih pawhin Mizoramin khatianga kan state a ni an rawn ti kha hmasawnna lianah kan ngai,” Phuldungsei-a an hruaitu pakhat chuan a ti.