Nimin khan horticulture minister chuan Thenzawla lamlian dunga Dragon fruit chinna Zau a tlawh a, huan neitute thawhrimzia leh an hmasawnna te chhuanawm a tih thu a sawi a. Dragon fruit sawngbawl dan tur an zawn mek thu leh a powder ang zawnga siam an rilruk thu a sawi.
Thawhrimna sawi dawn chuan Israel hi a lo lang vat thin. Mizoram atanga Israela-a pem lut ten an sawi fo chu, Israel an thlen hnua hna (a bikin farming) an thawhrimzia leh farming system a that bikzia an sawi thin a. |henkhat chuan, ‘Israel-a thawkrim peih chuan Mizoramah pawh thawkrim ve se a ni mai alawm’ an ti thin a. Mahse hei hi ngaihdan famkim lo a ni a, a chhan chu, Israel chuan farmer-te thawhrim theihna tur farming system tha a chhawpchhuak bik tlat a ni.
Israel ram leilung khu Mizoram leilung anga khawi hmun pawha thlai tiak han sawhphun mai theihna tur khawpa ram tha a ni lo a, Mizoram tiat leka zau a ni a, hmun thuma thena hmun hnih khu ram ro (semi-arid) a ni a, thlai chawmna tur ruahtui a tha lo a, lui tui lak tur pawh a tha lo. Chuti chung chuan an han tang tak tak a, Agricultural Research Organization (ARO) an han din a, khawvela agricultural technologies nei changkang leh changtlung ber an ni thei.
Mizoramin farming kan buaipui dan chu kan hre tlangpui a; kan hriat tlangpui anga kan la awm avanga hetiang dinhmuna la ding reng hi kan ni. Kum tin thlai/thei kan ching a, kan tharchhuak ve reng tho; kan buaipui reng, kan hahpui ve em em, mahse thlai chingtuten hlawkpui tham an tharchhuak thei lova, sawrkar lam lahin thlai chingtute tana sum leh tha a sen hnem ngaihtuahin state economy han khai kang ve thei deuh tur khawpin hmalakna langsar tham a la sual chhuak thei lo. Kan ram leilung lah hi, ruahtui dawng tha em em, ram ro pawh ni lo, leidur tha em em a ni vek a, a sawi uar deuh chuan, ‘thirtiang sawhphun pawh a chawr thei ang’ an lo tih hial a ni.
A nihna takah chuan, kan farmer-te hi chem tum nen an thawkrim takzet a, mahse sawrkar lam hian farmer-ten hlawk zawka an thawhchhuah theihna tur hian chemtum aia u zawk technologies hi a chhawpchhuahsak chau ve deuh chu a ni. Tuna Dragon fruit kan tuipui leh kan buaipui peih ang bawk hian, thlai/thei dangte pawh hi hlawk zawka farmer-ten an tharchhuah theihna tur hi, ‘election oriented’ lamhawi ni lovin, buaipui tak tak a hun ve tawh a ni.
Mizoram farming leh thawhrimna…
