Mizoram hmingthatna chhawmnung zel ang – Larsap

Mizoram hmingthatna chhawmnung zel ang
– Larsap
Mizoram hmingthatna leh vanneih bikna chhawmnun a nih zel theihnan theihtawp chhuah theuh turin mipui a sawm tih larsap Gen. Vijay Kumar Singh (Retd) chuan a sawi.
State Day puala thuchah a siamah larsap chuan, lawm leh chhuanawm ti tak chungin Mizoram leh ram chhung mipui zawng zawng state puitlinga Mizoram hlankai a nih champhaah chibai thami a buk tih a sawi a. 1987 February 20 khan Mizoram chu India ram state 23-na ni tura puan niin, hemi hnu hian kawng hrang hrangin muanna, hmasawnna leh hlawhtlinna a zawh chho tih a sawi.
“He ni chhinchhiah tlak tak hi Mizo mipui chhelna, inpumkhatna leh suangtuahna a taka nemnghehna a ni a. Dawhkan kila inbiakna, mipui thlan rorelna leh inremna a taka tihhlawhtlinna lantir a ni. Hei hi 1986 June 30-a sawrkar laipui leh Mizo National Front inkara inremna thuthlung ziah khan a entir a, he inremna hi India ram chanchina inremna thuthlung ziah tawha hlawhtling leh tlo ber zing ami a ni,” a ti.
State nih hnuin Mizoram chuan kawng tinrengin hmasawnna hmel thar chhinchhiah tlak tak tak a hmu tih a sawi a. Ram pum huapa hriat a hlawhna em em – hnam ziarang hausa tak, nunphung nghet tak leh khawtlang inlungrualna hloh chuang loin zirna, hriselna, hmasawnna ruhrel din leh ngelnghet siam kawngah nasa takin hma a sawn tih a sawi a ni.
State ralmuang tak, mawi leh hnam ziarang hausa, khawtlang inlungrual, sik leh sa nuam, fai leh boruak thianghlim thlenga nei a nihna chu Mizoram thangmawina leh mite ngaihhlutna a ni, tiin, “Heng kan hmingthatna leh vanneih bikna hi chhawmnung turin theihtawp chhuah zel ang u,” a ti.
Mizoram chu India ram hmun pawimawh taka awm a ni tih larsap hian a sawi a. Chhak lamah Myanmar leh thlang lamah Bangladesh ramin an kar cheh avangin, khawvel dinhmun inher danglam zel leh India ram Act East Policy kalpui mekah dinhmun pawimawh tak a luah tih a sawi.
“Ek Bharat Shreshtha Bharat” thil tum hrereng chungin, mitinin mahni hnam nihphung hloh chuang loin, inpumkhatna leh inlaichinna tha zawk a awm theihnan ram chhunga cheng hnamdangte nunphung, tih dan leh hnam ziarang zah saka ngaihven turin a sawm tih a sawi a ni.
“He ni danglam bikah hian Mizoram leh India ram chak leh hmuingil din turin inhlan thar leh theuh ila, tangrual leh inremin kan thil rochun kan ram leh hnam vawnghim zel chungin hmasawnna kawng zawh ila, kum 2047-a India ram intodelh leh mahni kutkea ding thei ‘Viksit Bharat’ siam turin mahni phak tawkah tha thawh theuh ang u,” a ti bawk.