Mizoram kawng tan hma la
Mizorama kawngpui siam dan phung thlak turin chief minister Lalduhoma chuan sawrkar laipui a ngen a. Kawng sial dawn aforest clearance hmuh harsa lutuk thin tih ziaawm dan tur a thlen bawk
Mizoramah alkatra (bitumus) hmanga kawng siam kalpui mek chu thlak a, cement (rigid pavement) hmanga siam tawh turin Ministry of Road Transport & Highways-ah an thlen tih chief minister hian a sawi a. A hman tan hun tur sawi nghal theih ni lo mah se, an pawmsak viaua an hriat thu a sawi.
Mizoram kawng, national highway leh state highway sial turah, kut thlak dawnin forest clearance dil hmasak a ngai a, pek a nih mai thin loh avangin kut thlak lohin a inhnawh khawm ta thin a. Awlsam zawka clearance hmuh theihna atan Mizoram pum chu ‘strategic highway’ a puansak turin Defence ministry an ngen tih chief minister hian sawiin, “Ramri atanga boruak mel km.100 bial chu strategic highway-a puan theih a ni a, Mizoram hi km.100 huamchhungah vek a awm avangin harsatna awm thin hi a ti ziaawm thei dawn a ni,” a ti.
Army pangngai ang tho tur, Mizorama international border-a duty tur Mizo Territorial Battalion din an dil a, Defence minister chuan Cabinet Committee on Security-a putluh a lo tiam tih a sawi.
Kolasib district Thingdawl Nursing School chu nursing college-a hlankai an dil angin remtih sak an ni a, a bul tanna atan cheng vaibelchhe 7 an dahsak nghal tih chief minister hian a sawi a. Finance Commission atanga village council-te sum hmuh thin, 2022- 2023 a an dawn la tang chuan 2023-2024 a an dawn tur thlengin a tih buai phah a, sum la tang cheng vaibelchhe 35 chu an nawr chhuak tih Lalduhoma hian a sawi bawk.
Industry lama hmasawnna tur scheme, Uttar Poorva Transformative Industrialization Scheme (UNNATI 2024) ah India ram pum tan cheng vaibelchhe 4000 dah niin, Mizoram-in tun thlengin project pakhat chauh a la thehluh avangin kan duh ve vak lo niin an lo hria a, an dil angin Mizoram tan cheng vbch. 453 an dahsak a; thalai, industry lama tuimiten bawh chak se, project siam thuai thuai se an duh hle tih a sawi a ni.
Mizoram kawng tan hma la
