Tun hnai khan AH & Vety Farm, Thenzawlah chief minister Pu Lalduhoma’n artui thar chhuahna hmunpui dinna tur lungphum a phum a. He hmunah hian arpui nuaikhat vel a vulh theih dawn a, ni tin artui 70,000 vel thar chhuak thei tura beisei a ni. Artui thar chhuahna hmunpui din nan hian NABARD RIDF atangin cheng vbc 20.64 puk a ni.
Artui hi chhungkaw tinin chawhmeh atan kan hmang nasa a, restaurant/hotel leh kawngkam dawrah te pawh artui hmangin eitur kan siam nasa a, ni tina artui kan hmanral hi a tam tham hle awm e. Chutih laiin, heti khawpa artui hmang nasa si hi, mahnia tharchhuah tumna lamah ke kan pen zau lo hle a. State dang atangin ni tin artui tam tak kan chawlut reng a, state pawna artui man pawisa kan thawn chhuah hi a tam tham dawn hle tihna a ni.
Tun dinhmuna Mizoramin artui a thar chhuah ve dan hi statistic lamah hmuh tur a awm mumal lova. AH&Vety official website-a kan hmuh theih tharlam ber chu kum 2019-a ‘Mizoram 20th Livestock Census’ kha a ni a; ar vulh zat (20,34,294) a lang a, artui lam a lang lo. Hetih lai hian district hrang hranga poultry demonstartion farm leh poultry development farm thenkhatah chuan artui chu an thar chhuak ve nual awm e, sawi tham erawh a ni lo ang.
Sangha pawh kan chawlut nasa; mahse, sangha erawh kan mamawh zatve vel chu kan thar chhuak ve a ni awm e. Fisheries department official website-a kan hmuh dan chuan, 2024-25 chhunga Mizorama sangha thar chhuah MT 7152 kha kan mamawh zat atanga 52% a ni a, 48% chu state dang atangin kan chawlut tihna a ni. Chumi awmzia chu, sangha man cheng za ni se, cheng 52 chu Mizoramin kan chang a, cheng 48 chu state dangin an chang tihna a ni.
Artui hi chu kan mamawh hmun sawma thena hmun khat pawh hi kan tharchhuak lovang. Artui pum 10 cheng 100 ni ta se, cheng 90 chu state dangin an chang dawn tihna ang vel a ni awm e.
Tuna artui tharchhuahna hmunpui sawrkar hmalaknaa din a ni hi a lawmawm hle a, ni tin artui 70,000 a thar chhuah theih chuan, thla khatah artui nuai 21 a tling dawn tihna a ni a, state danga pawisa kan vawm bo duak duak thin ang kha Mizoram chhungah a vir vel tawh dawn a; NABARD atanga cheng vaibelchhe 20.64 puk hi Mizoram tan investment tangkai tak a tling thei dawn tihna a ni. Thenzawlah chauh lo pawh, district dang hmun remchang a awm chuan artui tharchhuahna hmunpui hi din belh zel ni se, artuia intodelh ringawt pawh hi Mizoram hmasawnna ropui tak a tling dawn tihna a ni.
Mizoramah hian mimal hausa tak tak hi an tam ve ta hle a, Mizoram economy dawmkanna lam hawia an hausakna sum thap kual (investment) lamah hian harh tharna chang sup sup se a duhawm hle a ni.
Mizoram leh artui
