Inland Waterway Development Council thutkhawm vawihnihna chu kar kalta Zirtawpni khan Assam state-a Kaziranga-ah neih niin he hunah hian transport minister Pu Vanlalhlana pawhin Mizoram dinhmun leh mamawhte a sawi chhuak a. Mizoramah Inland Waterway kalpui theihna tam lo mah se, a awm chhunte tangkai taka hman a nih chuan inkalpawhna kawnga harsatna leh zin mite phurrit engemaw chen chhawk zangkhai a nih tur thu a sawi a ni.
Inland Waterway Authority of India hmalakna hnuaiah hian state 21 leh UT tan Rs. 1405.26 Crore hu project siam a ni a, Mizoram pawhin cheng vaibelchhe 12.1 (nuai 1210) a chang ve a, Mizorama project kalpuina tur hi Tlawng, Chhimtuipui leh Khawthlangtuipui to Tuichawng, Lunglei district-te a ni.
Hun kal tawh lamah khan, PIB thuchhuah (2.3.2022)-in Ministry of Ports, Shipping and Waterways (MoPSW) thu leh hla a tarlan dan chuan, inland water transport Khawthlangtuipui (Karnaphuli)-Tuichawng Km 23-a thui siam nan cheng vbch 22.93 (Nuai 2293) ruahman a nih thu leh, heta tanga cheng vbch 6.17 (nuai 617) chu MoPSW-in Central Sector Scheme hnuai atangin a sanctioned tawh thu tarlan a ni a. Tunhnaia IWD Council thutkhawmnaa Mizoram tana ruahman cheng vbch 12.1 tihah hian ‘Khawthlangtuipui to Tuichawng’ tih a tel leh tho si a, hei hi mipui tan chuan hriatthiam a harsa deuh dawn niin a lang a. Kum 2022-a MoPSW thuchhuaha ‘Khawthlangtuipui (Karnaphuli)-Tuichawng Km 23’ tana vbch 22.93 ruahman tawh si, tuna Inland Waterway Authority of India hmalakna hnuaia vbch 12.1 tiha Khawthlangtuipui tel leh bawk si hi, he lam buaipuitu official-te hian chiang zawkin mipui hrilhfiah thei sela a duhawm ngawt mai. Kan minister-in a sawi ang hian, Inland Waterway kalpui theihna awm chhunte hi chu sawrkar laipui sum hmang hian hman tangkai ngei theih tura tihpuitlin tuma nasa taka tanlak hi keini state pachhe tak tan hi chuan kan tihmakmawh a ni e.
Mizoram leh Inland Waterway Transport
