Kumin chhung hian Excise department chuan The Mizoram Liquor (Prohibition) Amendment Act 2025 hnuaiah rakzu litre 20426.214, zu bilh lai tin 47,388 bakah India siam a senchi (IMFL) litre 5765.380 an man tawh a. Zu man dan hi, chawhrualin thla tin rakzu litre 5106, chu chu ni tin litre 170 tihna a ni. Man chhuah loh hi a la tam hle bawk ang tih a rin theih. Zu hi khap ni mah se, englai pawhin zu chi hrang hrang a awm reng tho a, hei hi kan kum tin dinhmun a ni.
Mizoram hian zu hi kan buaipuina a rei ta hle a. A changin khap a ni a, a changin dan anga zawrh a han ni leh lawp lawp a. Sawrkar pakhatin zu zawrh phalna dan a siam a, sawrkar dangin zu zawrh khapna dan a rawn siam ve leh a. Chutiang reng reng chuan Mizoram hian zu hi kan lo buaipui tawh a. Thil pakhat chiang tak chu, kan khap emaw, khap lo emaw, zu hi chu englai pawhin a awm reng tho tho, tih hi. Rakzu pawh ni tin litre tam tak tak, zu bilh lai tin sang tam tak nen man chhuah leh tihchhiat reng a ni a, a rem thei tak tak lo a, khawvel a awm chhung hian ‘rakzu free state’ hi a thleng ngut ange maw!
Hnam hrang hrang hian mahni hnam pual bil zu hi kan nei fir fer a. India hmarchhak state zingah chuan Manipur state-a Sekmai zu hi a lar ber pawl a nih a rinawm a. Thingtlang khua ‘Awang Sekmai’ atanga siam a nih avangin a khaw hming kha ram dang mi khualzinte leh Manipur mipuite ngei pawhin zu hmingah an hmang zui ta mai thin a ni awm a, ‘Sekmai Yu’ ti kher lovin, Sekmai tih chuan an hrethiam vek tawh mai a ni. Sekmai zu hi Manipur zu khapna danin a phuar ve lo a, tunah hian state revenue tha tak pakhat a tling ve a ni awm e.
Heti taka zu khapna dan kan kengkawh chung pawha a rem thei lo a nih chuan, a hman tangkai dan lam hi kan zawn a hun tawh a ni mai lo’m ni? tih hi zawhna pawimawh tak a ni tawh awm e. ‘Kristian ram kan ni a’ tih leh ngawt ai chuan, Kristian ramah hian a rem thei bawk si lova, awmze nei zawk leh tangkai zawka hman tum mai hi a finthlak zawk awm e. Chutih rualin, kan hnam zu humhalhna a nih bakah, tunhmaa pi leh pu ten rakzu an lo thlawr dan dik tak ang khan siam chhuah tum leh ta zawk ila, dan fel tak hnuaiah khuahkhirh ila, khualzinmite pawhin traffic discipline tih ringawt lo deuh sawi tur dangte pawh an hriat phah ang a, kawng hrang hrangin kan thatpui bakah kan hmingthanpui phian mai thei asin!
Mizoram leh Rakzu
