Mizoram leilungin 4-lane a tlin lo RCC 2-lane kan mamawh tawk – MENCO

Mizoram leilungin 4-lane a tlin lo RCC 2-lane kan mamawh tawk – MENCO
Mizorama four lane laih tum chu kan leilungin a tuar nasa hle dawn tih environment humhalh lam buaipuitute chuan an sawi a. RCC two lane chu kan mamawh ber zawk a ni tih an sawi.
Mizoram Environmental NGO Coordination Committee (MENCO) chuan hmasawnna ruhrel lian tak kan nei tur chu lawmawm an tih rualin environment nen kalkawp tir ngei nise an duh tih a sawi a. Development leh environment kalkawp tir nachang hre loa, development chauh thlir ram leh India ram state thenkhatte dinhmun thlirin, hetiang dinhmun hi thlen ve loh hram an duh tih a sawi.
Vairengte – Sairang national highway four lane sial tum mekah kan ram anga chhengchhia leh nghet lo, ramngaw in van ruahtui a khawla a pek leh lui tui ringa nung tawk tawk tan 4-lane kawng laih avanga hmasawnna awm tur leh, he kawng laihin a tih chhiat tur ramngaw, leilung, luikawr leh tuihna, nungcha leh environment a inbuk tawk lo a, a tuar nasa ber tur chu mi rethei an ni dawn tih a sawi.
Himalaya tlangdung chhengchhia leh a leilung pawh nghet lo taka kan tlangte la him hram hram chhan chu, thing zungtenn lei an tham khawm vang mai mai a ni, tiin, ‘Kawngpui 4-lane-a laih a nih chuan kan thing leh mau, kan nungchate leh kan ram luiten nasa takin an tuar dawn,’ a ti.
Rel kawng chu Sairang thleng zawhfela hawn a ni tep tawh a, transport lamah rel a tangkai zel dawn tih MENCO hian sawiin, ‘Hetiang a nih laia kan environment leh ram leilung awm dan (geological formations) in a tlin loha kua lo hreuh belh hi, chhiatna zakhua bak min thlen lo ang tih kan hrechiang a. Four lane kawngpui laih a nih chuan kopang a sang dawn lutuk a, leimin nasa tak a siam ngei dawn. Environment a tih chhiat hi a nasat dawn bakah mipui vantlang, a bikin zinmite himna atan a hlauhawm hle dawn,’ a ti.
4-lane kawngpui neih belh ai chuan 2-lane kawngpui tha, RCC base chu kan mamawh zawk niin an hria thu sawiin, chutiang a theih loh pawhin 2-lane kawngpui pahnih, a thiang (parallel) a sial ni se leimin a tlem zawk dawn bakah environment tih chhiat a nei tlem zawk dawn tih a sawi.
Four-lane kawngpui chu siam a nih talh dawn emaw eng ang kawngpui pawh sial ni se, leivung paihna leh paih dan, spoil bank uluk turin an duh tih MENCO hian a sawi.
‘He kawng laih tura sawrkar thuneitute kan ngen chu, leivung paih uluk leh dan ang taka hma lak a ni. Kan ramah tui hna nasa takin a kiam mek a, kan lui tui a kangchat mek. Ruah a sur loh kumah chuan mipuiin tui tlakchham leh tui atanga inkaichhawn theih natna vei kan hmabak a. Uluk takin leivung an paihna leh paih dan kan thlir dawn,’ a ti.
Eng kawngpui pawh sial nise, environment dan leh hrai zawm chunga uluk taka hma la turin leh a endiktu – DC, Forest department, PWD adt. uluk taka endik turin an phut tih a sawi a. Tuna NHIDCL hnathawh mek anga environment tichhe zawnga thawh zel chu an duh tawh lo tih sawiin, ‘Dan bawhchhiatna lian a thlenin National Green Tribunal emaw law court-ah emaw kal turin kan inring reng a, chutiang thlen ngai loa kawngpui laih hna leh hmasawnna hna thawk turin thuneitute leh a mawhphurtute kan beisei a ni,’ a ti.