Mizoram Lokayukta-in case 58 chingfel tawh

Mizoram Lokayukta din a nih atanga tun thlengin thubuai 91 ziahluh a ni tawh a, heng zinga 58 hi chinfel a ni tawh.
Mizoram Lokayukta Act 2014 hnuaia Section 47-in a phut angin Mizoram Lokayukta chairperson Lalmalsawma chuan larsap Gen. Vijay Kumar Singh (Retd) hnenah Ningani khan Mizoram Lokayukta Sixth Annual Report 2024- 2025 a hlan. Annual report hian 2024 April 1 leh 2025 March 31 inkar a huam a, Mizoram Legislative Assembly thutkhawmah pharh a ni ang.
Mizoram Lokayukta chairperson leh amah tawiawmtu member pahnih – Lalsanglura leh Joel Joseph Denga te chuan larsap hnenah hian Mizoram Lokayukta dinhmun leh hmalakna tlangpui an hrilhfiah a. Lokayukta hnuaia case neih dan leh bawhzui dan bakah dinhmun leh thlen chin an hrilh.
Larsap chuan an hmalakna fakawm tiin, nasa zawka tan laa theihtawp chhuah zel turin a chah.
Mizoram Lokayukta Sixth Annual Report tarlan danin, kum 2024- 2025 chhung khan Mizoram Lokayukta hnuaiah eiruk thubuai 20 ziahluh niin, heng zinga 6 hi preliminary inquiry tura thawn a ni. Hemi hun chhung vek hian preliminary inquiry report 8 dawn a ni a, thubuai 5 chinfel niin, thubuai 1 ah mi 2 thiam loh chantir an ni.
March 2019-a din atanga 2026 January 8 thlengin Mizoram Lokayukta hnuaiah eiruk thubuai 91 ziahluh a ni tawh a, 58 chinfel tawh niin, preliminary inquiry leh investigation kalpui mek 33 a awm.
Eiruk thubuai hi engtik lai pawhin a thlawn vekin Mizoram Lokayukta office MINECO-ah lehkha pheka ziakin emaw email – Mizoram.lokayukta@mizoram.gov.in ah thlen theih a ni a. Mahni nihna tilang duh lo chu an nihna thup sak thin a ni. Lokayukta lam atanga biakpawh theihna erawh dah tur a ni.