Mizoram luhchilh turin larsap-in
investor/ company liante a sawm
Ministry of Development of North Eastern Region (DONER) leh Federation of Indian Chambers of Commerce & Industry (FICCI) tangdun chuan Park Hyatt Hyderabad-ah Northeast Trade and Investment Roadshow an buatsaih a, Mizoram larsap Dr Hari Babu Kambhampati chuan Nilaini khan a hmanpui.
Investor kalkhawm zinga drone pilot training leh service provider-te chu Mizoram sawrkar nen thawkdun a, agriculture leh pawimawh danga drone hman dan inzirtir turin larsap hian a sawm a. Technology lama theihna sang tak nei Mizo thalaite chhawr tangkai an nih theihnan IT company leh skill development provider-te chu hun remchang siam sak turin a sawm.
India hmarchhak chu ram leilung hausa leh theihna sang tak nei a ni, tiin, industrialist-te chu hei hi remchanga hmang a, technology nen tangkawpa tan la turin a sawm. Mau tamna NE state-ah ethanol siamchhuah chu investment tihna remchang a ni tih sawiin, sawrkar laipuiin hmarchhak hmasawnna ngaipawimawhin theihtawp a chhuah a, hmasawnna hrang hrang a thlen mek tih a sawi.
Tunhnaiah NE India-ah inkalpawhna kawngpui km 3000 chuang siam zawh a ni a, kum thum chhungin km. 10000 siam leh tum a nih bakah project 400 vel, cheng vaibelchhe nuaikhat dawn thawh mek a ni tih Dr Hari Babu Kambhampati hian a sawi a. Tunhnai kum 8 chhungin zaa 113-in air traffic a pung a, airport thar 8 awm belhin, waterways 17 a awm belh bakah rel kawng km 400 dawn siam a ni a; Aizawl chu nakumah rel kawnga thlunzawm hman tum a ni tih a sawi bawk.
Roadshow-ah hian DONER joint secretary Monalisa Dash chuan “Advantage Northeast, opportunities for Investment & Trade” tih thupui a sawizau a. UNNATI Scheme chunchang zirho a nih bakah DONER minister of state Dr Sukanta Majumdar leh secretary Chanchal Kumar ten thu an sawi a. North East State hrang hrangin presentation neiin investment lama theihna an neihte an sawifiah a ni.
Mizoram luhchilh turin larsap-in investor/ company liante a sawm
