Lawngtlai district atanga Myanmar ram lam nena tualchhungmite insumdawn tawnna chu Mizoram mi pakhat Myanmar lama chin hriat loha a awm avang leh a hnua a ruang chhar a nih avangin ramri hi khar rih a ni.
Thudawn danin, Lalramsanga (37) s/o Lalremsanga, AOC Veng Lawngtlai chu ram pahnih insumdawn tawnnaa lirtheia bungrua phur thin a ni a, February 11 khan a nau Lalthlamuana nen Myanmar ram lam Salachhuah panin an kal a, khua hi February 12-ah thlengin hotel pakhatah an innghat a. Lalramsanga hi hemi zan dar 9.00 vela hotel atanga a chhuak chu a chin hriat zui a ni ta lo a ni.
Hetihlai hian February 13 khan Kawl pa pakhat chuan Lalthlamuana hnenah hian Lalramsanga lirthei (pik up) chabi leh a driving license hi a pe a, a pik up chhunga a hmuh niiin a sawi. Thu han zawh zuinaah engmah a hriat loh thu a sawi a, pik up ruakah heng a thil hmuh hi a lo awm niin a sawi a ni. An awmnaah hian mobile signal a awm loh avangin Lalthlamuana hian Mizoram lam a rawn let leh hnu ah thil awmdan hi a sawichhuak ta a ni.
Central Young Lai Association chuan Mara Thalai Pawl Gen. Hqrs. be pawpin Inrinni khan Tuipui Ferry-ah an inhmukhawm a. February 15 (Pathianni) chawhnu dar 3.00 thleng an ngaichang anga, Lalramsanga chanchin hriat a nih loh chuan Lawngtlai leh Siaha district atanga Myanmar lam bungraw phur lirthei kal turte dan vek nise, an ti a. Mizoram lama Myanmar lirthei awm mek pawh an thlen chinah ding vek tura tih an rel bawk.
Hetiang a nih mek lai hian February 15 tlai khan Lalramsanga ruang hi Chhimtuipui leh Salachhuah inkarah hmuh a ni a. CYLA leh MTP hruaitute hi inhmu lehin hma lak zel dan tur an rel a. Ramri inkalpawhna khan zawng zawng khar rih hi chu an rel tih thudawnna chuan a sawi.
Mizoram mi tualthihna avangin chhimlamah ramri khar vek rih
