Kan ram leh hnam, sakhua humhim zel a nih theih nan tun hun hi tanrual hun a ni tih MNF vice president Lalchhandama Ralte hian sawiin, tanrual puiah a sawm tih a sawi.
MP inthlan campaign-a Chalfilh bial khaw hrang hrang tlawha fehchhuak MLA Lalchhandama Ralte chuan, tun Lok Sabha inthlanpui hi hun danga MP inthlan aiin a pawimawh bik tih a sawi a. Kan ram leh hnam, sakhua humhim tura mi huaisen, Vaiho hmaa zamloa ding tur Mizoramin a mamawh hun lai ber a ni, tiin, Mizo mipui leh thalai zawng zawngin political party tan zawng kan neih dahtha in, Pu K Vanlalvena vote vek turin a sawm tih a sawi.
Mizoramin MP inthlanpui a lo hmachhawn tawhah sawrkar lai candidate ringawt thlantlin an ni ngailoa, hei hian a hunlai ram boruak ang zelin mipuiin MP inthlanah sawrkar lai candidate ringawt thlan an tum loh zia a tichiang tih a sawi a ni.
ZPM party chu an MP candidate ruat chungchangah an lungrual lo hle niin Lalchhandama Ralte hian a sawi a. Thlak leh theih nise, minute khat pawh inngaihtuah loin an thlak leh duh nghal a ring tih a sawi.
Tuna kan ram dinhmunah Mizoramin Vai mizia hria aiin Vai ngam MP, Mizopa huaisen tak kan mamawh zawk tia sawiin, “Mizoram hi kan pi leh puten luchhum banchhum huama an sah zau, hnamdang lak atanga an nunna hial hlana an lo venhim ram a ni a, thangtharten a humhalh leh venhim chu kan mawhphurhna a ni. Hun rei tak chhung YMA chuan ‘Ram leh hnam humhalh’ tih kumpuan atan a lo hmang tawh a, kan ram hmalam kalzel tur thlirin tuna MP candidate hi uluk taka kan thlirchhian a ngai a ni,” a ti.
Mizoram mipui tanrual hun a ni – Lalchhandama Ralte
