Mizoramah nurse-te an hnathawh phu loa an hlawh a tlem chu veiawm a tih thu Health Family Welfare minister Lalrinpuii chuan a sawi.
Mizoram College of Nursing chuan Zirtawpni khan Graduation and Lamp Lighting Ceremony 2024 an hmang a. Hmanpuitu Health minister chuan nurse hna chu hna zahawm leh hna tha a ni, tiin, sawrkar pawhin a ngaipawimawh tih a sawi.
“Tunlaiah social media a chak tawh a; nurse vin, nurse sual chungchang hmuh tur a awm leh thin hi a pawi a. In tawngkam khat lek pawhin damlote a ti dam sawng sawng thei a, midang tanpui thei tura zirchhuak in nih inhrereng ang che a ti. Mizoram nurse-te an hnathawh phu loa an hlawh a tlem chu a veiawm tiin an harsatna sutkianpui turin theihtawp a chhuah reng thu a sawi a ni.
Mizoram Health System Strengthening Project hnuaiah World Bank funding-in MCON thuamthat hna thawh mek a ni tih minister hian a sawi a. Building sakna atan cheng vaibelchhe 5.73 leh hmanrua leh furniture tul lei nan vaibelchhe 3 sanction niin, hna hi August 2023 atanga thawh tan a ni tih a sawi.
Kum khata seat 25 awm thei M.Sc Nursing leh kum khata seat 30 awm post basic B.Sc Nursing zirna 2025 July atanga tan tura hma lak mek a ni tih a sawi a. Ministry hnuaiah Mizorama nurse-te tan training paruk pekna tur dilna siam niin, phalna pek tawh a ni a. Cheng nuai 13.71 vel tura ruahman a ni tih a sawi bawk.
MCON principal Lalduhsaki report danin, MCON hi GNM (General Nursing and Midwifery) zirna atan kum 1980 khan din a ni a; kum 2005-ah B.Sc Nursing zir tan theiha buatsaih a ni. Tunah hian nurse zirlai 131 awmin, zirtirtu 22 leh non teaching staff 30 vel an awm. Graduate tharte hi batch 16-na niin, an vaiin 30, hmeichhia 28 leh mipa 2 an ni. TATA Medical Center Kolkata, Apollo Hospital Delhi, Max Hospital Delhi leh Yashoda Group of Hospital Hyderabad- ah te placement job hmu sa 17 an awm a ni.
Mizoram nurse-te an thawh phu loin an hlawh a la tlem – Health minister
