Mizoram Official Taekwondo Championship
Ni thum awh tur 26th Mizoram Official & 18th Mizoram Poomsae Taekwondo Championship 2025 chu Nilaini khan Electric Veng YMA Hall-ah home minister K. Sapdanga’n a hawng a; SYS department director H. Lalhmingthanga’n hmanpuiin fuihna thu a sawi ve bawk.
June ni 18-20, 2025 chhunga zawh fel tura ruahman he championship-ah hian Mizoram district hrang hrang atangin team 30 an chhuak a; poomsae leh kyorugi hmanga inelna kalpui niin, poomsae-ah mi 148 an tel a, kyorugi inelnaah player 321 chhuakin, an vaiin 469 an tel.
He’ng zinga player 197 zet chu hmeichhia niin, player naupang ber chu Lalruatdiki d/o Lalremmawii, Chhinga Veng niin, kum 5-a upa a ni.
Mizoram Amateur Taekwondo Association (MATA) buatsaih inelna lian ber Mizoram Official Taekwondo Championship-a gold medalist-te hian Mizoram Champion of Champions Title 2025 an chuh thei dawn bakah national/regional inelna hrang hrangah Mizoram aiawh turin thlan a ni bawk ang.
Championship hawngtu K. Sapdanga chuan MATA chu association entawn tlak ni zel turin a fuih a, lnenkawlna te, national achievement te, khawtlang tana hna tha tak an thawh thinte chu sawrkarin a hriatpui tih sawi chungin chhunzawm zel turin a fuih a; kum 2036 Olympic thlirin taekwondo player-te atangin an tel ngei theihna tura tan la turin a fuih bawk. Hemi kawngah hian insum theihna te, zuk leh hmuam ruihhlo laka fihlim zel turin a chah tel.
Official championship hawnna inkhawm hi MATA president Prof. Rualkhuma Colney-in a kaihruai a; MATA general secretary Joseph Thansanga’n report pein, player aiawh leh technical official aiawhte’n intiamna thu an chham a; MATA vice president R. Lalrinmawia’n lawmthu sawiin hun a khar.
He championship hi Mizoram State Sports Council kum 50 tlin lawmna tura buatsaih a ni.
Mizoram Official Taekwondo Championship
