Mizoram Ombudsman ruat thar
Ombudsman (independent local body) Mizoram State atan C Lalthanmawia, IPS (Rtd) ruat a ni a. Zirtawpni khan larsap Gen. Vijay Kumar Singh (Retd) chuan Raj Bhavan-ah rinawmna thu tiamtirin a lalut.
Lakluh inkhawmah hian chief secretary charge latu H Lalengmawia’n larsap-in Ombudsman atana C Lalthanmawia a ruatna notification a chhiar chhuak a. Hemi hnu hian larsap chuan rinawmna thutiam chham tirin a lalut a. Lakluh inkhawmah hian Home minister K Sapdanga, minister dang – C Lalsawivunga leh Lalthansanga bakah deputy speaker Lalfamkima, leader of opposition Lalchhhandama Ralte leh sawrkar hotu dang an tel.
Ombudsman (independent local body) Mizoram State atana lakluh tak C Lalthanmawia, IPS (Rtd) hi 1965 February 12-ah piangin thiamna lamah BA, LLB a ni. Kum 1989 khan Mizoram Police Service zawmin, kum 2022 khan Indian Police Service, AGMUT cadre (Mizoram Segment) a hlankai a ni. Mizoram sawrkarah mawhphurhna pawimawh tak tak chelh tawhin, heng zingah hian Fire & Emergency Services director, AIGP (Police Modernization) PHQ; DIGP Southern Range leh DIGP Northern Range a lo chelh tawh a ni.
Kum 2012 khan President Police Medal for Meritorious Service dawngin, kum 2020 khan President Police Medal for Distinguished Service a dawng. Mizoram sawkar hnuaia hun engemawgchen a service hnuin kumin February 28 khan DIGP Northern Range Mizoram post a chelh laiin superannuation pension-in a chhuak.
Kumin August 27 & 28 Mizoram Legislative Assembly thutkhawm neihah khan ‘The Mizoram (Establishment of the Independent Local Body) Ombudsman Act 2011’ thlakna tur ‘The Mizoram Local Bodies Ombudsman Bill 2025’ chu House-in a pawm a. The Mizoram Local Bodies Ombudsman Act 2025 hi a hmaa Act ang loin Autonomous District Council huamchin tih loh Mizoram hmun dang zawnga hman tur a ni. Local body-te leh an hnuaia thawk sawrkar hnathawkte kalsual tur vengtu tur leh an chunga rorel theitu tur a ni. Ombudsman hi state sawrkar secretary rank aia hniam lo nilai emaw lo ni tawh thin emaw ruat theih a ni.
Mizoram Ombudsman ruat thar
