Mizoram Open Athletics Meet 2024 a \iak Non Residential Coaching an champion

Mizoram Athletic Association buatsaih ni thum awh Mizoram Open Athletics Meet vawi 31-na chu nimin, September ni 26, Ningani khan zawh fel a ni.
A pumpuiah Non Residential Coaching (NRC) an champion a, Hrangbana Collage (HBC) chu pahnihna an ni.
Best athlete mipaah gold medal pathum awrhtu Letzakai Lenthang, NRC thlan a ni a; hmeichhe lamah best athlete Elisian Medai (HBC) chuan gold mesal pahnih leh silver medal pahnih bawk a hlawhchhuak.
Nimin result thlikual leh ila
Mipa metre 100 intlansiakah NRC team chhuanvawr Letzakai Lenthang chuan Mizortam record thar siamin intlansiak tlankawng tawiber leh ngaihhlut hlawh ber hi second 10.88 chhungin a tlan thleng.
100m race-a mipa world record 9.58 seconds chu kum 2009 daih tawha Jamaican sprint king Usain Bolt-a siam kha niin, hmeichhe world record ding lai chu kum 1988-a United States nula Florence Griffith-Joyner siam 10.49 seconds kha a ni ve thung a, Mizoram record hian hmwichhe world record a la khing pha lo viau a ni!
Nimin Rajiv Gandhi Stadium-a 100m race hmeichhe champion Elisian Medai pawhin Mizoram record thar siamin second 13.67 chhungin tlankawng a zawh zo.
200 metre gold awrhtu pawh Letzakai bawk niin, second 23:10 hmangin record thar a siam a; hmeichhe 200m lamah pawh record thar bawk kan hmu a, second 28.93 chhunga thleng hman Vanlaltleipuii (NRC) chuan gold medal a awrh.
400m mipa intlansiak hnehtu pawh Letzakai Lenthang leh bawk niin, gold awrh chunga record thar siam turin second 53.32 a mamawh.
Hmeichhe 400m gold leh record siam turin Vanlaltleipuii’n minute 1:04:81 a hmang.
Metre 1500-a thui hmeichhe intlansiakah HBC team aiawh Ramdinmawii Chhangte (5.35.77mins) chu pakhatna a ni a, hei pawh hi record thar a ni.
4×100 relay race mipaah Non Residential Coaching team bawkin record siam chungin gold medal an hlawkchhuak leh a, he tlankawng hi second 45.51 chhungin an hlen a; hmeichhe lamah pawh NRC tho chak berin, second 57.95 hmangin gold an awrh a, hei erawh record thar a ni ta lo.
5000 metre mipa intlansiak hnehtu chu NRC tlanchak H. Ngohlaso (22:03:86mins.) niin, hmeichhe lamah HBC athlete Ramdinmawii Chhangte (23:52:76mins.) a chak ber ve thung.