Mizoram Police “Year of Discipline 2026-27” chu nimin khan home minister Pu K Sapdanga’n a hawng a. He hmalakna atana inkaihhruaina “Mizoram Police Model Guidelines for Year of Discipline 2026–2027” a tlangzarh nghal a.
‘Year of Discipline’ lungphum leh thlur bik turte hi : Hun vawn dik, mahni hnaa rinawm, leh thahnemngai taka mawhphurhna hlen chhuah; Hnathawh dan kalphung inkaihhruaina vawn dik, document vawn dik, dan zawm that, leh thubuai chhui (investigation) a hun taka tihfel; Hna chungchanga nungchang mawi vawn, mipui nena indawrnaah inthliar hranna awm lova rualkhai taka chet, mi harsa leh chak lo zawkte hriatthiamna neih; ‘Train to Excel’ programme hnuaia taksa hriselna leh engtik lai pawha che chhuak thei tura inbuatsaih; Turnout fel tak nena parade, drill leh endikna (inspection) neih thin; Police hmunhma hrang hrangte fai taka vawn leh enkawl; Sorkar bungruate uluk taka enkawl leh chumi chungchanga mawhphurhna lak; Rinawm, dik leh lang tlang taka hna thawh, leh Hotuten an hnuaia mite hnathawh vil That, tih te a ni.
‘Year of Discipline’ lungphum leh thlur bik turte hi Police nihna heng- Polite(Hawihhawm), Obedient(Thuawih), Loyal(Rinawm), Intelligent(Fing), Courageous(Huaisen), Efficient(Hna tlin) tihte hian a huam (cover) vek a tih theih awm e.
Eng vanga “Year of Discipline” chu Mizoram Police tana puan ngai leh hawn ngai ta tlat nge a nih(?) tih hi zawhna awm thei a ni.
Kan hria a, kum tin police tam tak an thih thu hi Mizoram rorelna in sâng berah pawh sawi rik a ni tawh Thin. Thih chhan tlanglawn berah pawh taksa invawnfelna (discipline) tlakchham vang a ni tlangpui. Ruihtheihthil avanga harsatna tawk an tam tihte pawh sawi rik a ni Thin. Hengte hi Discipline kenkawh mumal loh vangah puh a nuam berin a rinawm. Chuta a mawhphurtute chu “Hotute” an ni. Tun Tuma Guidelines chhunga “Core Principles and Specific Areas of Focus” zingah hian “Hotuten an hnuaia mite hnathawh vil That” tih a tel a. Hei hi Discipline innghahna pui ber a ni. Mizoram Police moto: Honour, Service, Excellence tih hlenchhuak thei tur chuan “Hotute” an pawimawh. Discipline kengkawhtute an inthlahdah chuan discipline dawngtu turte pawh an inthlahdah mai zel a nih hi.
Intuai thar ngai nih inhriatna leh chumi atana hma lak nachang hriatna hian Mizoram Police-te hi dinhmun sâng takah a hlangkai ngeiin a rinawm.
Mizoram Police “Year of Discipline”
