Mizoram taekwondo team
October 17-20, 2024 chhunga Puducherry-a khelh tur 40th National Senior Kyorugi & 13th National Senior Poomsae Taekwondo Championship hmachhawn tur Mizoram team chuan nimin khan Aizawl an chhuahsan.
Team chhuak tur thlahna inkhawm hi karliamta Inrinni khan MATA Hall, Republic Vengthlangah buatsaih niin, Mizoram Amateur Taekwondo Association (MATA) secretary (Organsing) H. Lalrammawia’n inkhawm a kaihruai a, R. Lalchhandama leh Lalinpuiate’n training report an pe.
MATA president ni mek Prof. Rualkhuma Colney-in fuihna thu sawiin, team uniform a tlangzarh a, team flag off hun a hmang nghal bawk.
Mizoram aiawhtute hi mipa 12 leh hmeichhia paruk niin, Poomsae player pakua leh Kyorugi player pakuate an ni a; teamhruaitute hi R. Lalchhandama (Mission Vengthlang) leh Lalinpuia (Armed Veng South)-te an ni.
Taekwondo Federation of India (TFI) sawm angin teachnical official turin Master Joseph Thansanga (Electric Veng) leh Robert Laltluangkima (New Serchhip)-te an kal bawk.
Mizoram aiawhtute thlir zui teh ang.
Mizoram taekwondo team
