Kumin October-a Mizorama Tourism Conclave neih tuma inbuatsaihna atan New Delhi-ah Pre-Conclave meeting neih tum a ni a. Hemi chungchangah hian Tourism minister Lalnghinglova Hmar leh NITI Aayog officer-te New Delhi Mizoram House-ah Zirtawpni khan an inkawm.
Minister chuan Sairang thleng rel a luh hnuah Mizoram tlawhtu an pung nasa a, chawhrualin thlakhatah mi nuai khat an chuang tawh a, thlawhna leh rela inkalpawhna a awlsam tawh avangin an pun zel an ring tih a sawi. India rama thlasik khawpui (Winter Capital of India) ni thei turin hma an la mek a, Mizoram tlawhtute rei zawk an cham theihna atan an tlawh tur leh tih tur tam zawk buatsaih kawngah hma lak mek a ni tih a sawi.
May hian New Delhi-a Vigyan Bhawan-ah pre-conclave meeting hi neih tum a ni a. NITI Aayog leh Mizoram sawrkar thawhho dan tur leh meeting neih tur kaihhnawiha mawhphurhna insem dan tur sawiho niin, NITI Aayog officer-te hi deputy director general Swapnalee Bhattacharya, ISS chuan a ho a ni.
Pre-conclave ah hian Mizoram hmasawnna tur uluk taka ngaihtuahin, India rama tourism kaihhnawih industry langsar leh stakeholder dangte nen ‘brainstorming’ neih a ni anga, chuta tanga hmalakna tur lo lang chu October-a Mizoram Tourism Conclave neih hunah a taka kalpui turin ruahman nise tih a ni. Conclave tihlawhtling thei tur mi pawimawh sawm tur leh programme kimchang chu Tourism department nen uluk zawka ennawna thutlukna siam nise, an ti.
NITI Aayog member Dr VK Paul leh Mizoram Tourism minister hi nikum November 10 khan New Delhi-ah tourism hmasawnna atana NITI Aayog leh Mizoram sawrkar hmalak ho dan tur ngaihtuahin an inkawm a, an thurel zingah Tourism Conclave buatsaih hi a tel. Tourism inkhawmpui hi kumin October-ah neih tum niin, stakeholder tam zawk an tel theihna tur leh, Mizoramin a hlawkpui theih zawnga ruahmanna siam nise tih a ni. Niti Ayog rawtna angin Tourism Conclave inbuatsaihna pakhatah pre-conclave meeting neih rel niin, NITI Aayog leh Mizoram sawrkarin hma an la dun mek a ni.
Mizoram Tourism Conclave neih tum New Delhi-ah urlawk dawn
