Prof. Lianzela
Nghakhlel taka kan lo thlir Central University chu Mizoramin kan nei ve ta! July 2, 2001 khan Vice Chancellor hmasa ber ni turin Prof. AK Sharma chuan Mizoram University (MZU) chu a rawn zawm ta a. Hun eng emaw chen chu July 2 hi MZU Foundation Day-a hman a ni a, mahse chik zawka ngaihtuah a nih hnuah University Bill Parliament-in a pass ni, April 25, 2000 chu Foundation Day atana pawm duh zawkna a lo awm ta a. Tichuan, Mizoram University Foundation Day atan April 25 chu hman a ni ta a ni. MZU Campus hi 970 acres-a zau a ni.
Mizorama University puitling neih duhna Mizo rilruah a awm reng a. Chumi tilangtu chu India sawrkar leh MNF inremna ziaha University din thu lo lang kha a ni kan ti thei ang. Mizoram Peace Accord 1986, Memorandum of Settlement-a University chung chang ziah lan dan chu: “It is open to the state to move for the establishment of the separate University in the state in accordance with the prescribed procedure” (Memorandum of Settlement 12(ii)) tiin.
Hemi bawhzuina ni awm tak hian Pu Laldenga (L), Chief Minister of Mizoram khan Chief Minister a nih laiin May 3, 1988-ah Pu PV Narasimha Rao, Union Minister of Human Resources Development, GOI, New Delhi hnenah lehkha a thawn a – “Mizoram mipuite hian zirna sang (University) danglam leh tha, an mamawh phuhruk tur, an ze mil leh khawvel tukverha an dah chhuah nan University satliah ni lo” a dil. Chu lehkha chhanna Secretary, Human Resources Development GOI-in August 25, 1988-a a thawn chu – Memorandum of Settlement on Mizoram para 12(ii)-a ziah lan angin Mizoram tana Central University lo buaipui turin Educational Consultant India hriattirin a senso tur pawh duan ni se. Project Report siam turah Expert Committee siamin chuta tel tur member pakhat emaw pahnih emaw rawt ni se,” tiin.
Hemi bawh zuina ni ngeia lang hian March 23, 1992 khan Mizoram State Assembly chuan Central University nei turin Bill an passed ve ta a. Mizoram University Detailed Project March 1992 (prepared by Ed. CIL, New Delhi – 110065)-a a lan dan chuan Total Project Cost (on Capital Account ie on non recurring account for a period of five years is estimated at ` 55.23 crores. The recurring costs has been estimated as ` 4.23 crore per annum. Project Report siamin Central Government of India-ah Bill chu thawn thlak a ni ta a ni. Chutia Central University nei mai tura inngaih laiin kum 1995 August 15 (Independence Day) khan AR Lammualah Chief Minister-in thu a sawinaah State University pek kan nih thu leh chumi atan sum pawh cheng vaibelchhe li (4 crores) min pek tur a puang ta mai a! |henkhat an lawm viau laiin NEHU Mizoram Campus-a zirtirtute leh Academic lama thil thlir thui deuh ho chu an lunghnur hle thung! Theih ang angin State Universiry chu hnawla Central University ngei Mizoramin a neih nan hma kawng hrang hrangin kan la ta char char a ni.
Central University neih nana hma lakna hi thuang hnihin a kal a tih theih a. |huang khatna chu Central sawrkar lam hawia hmalakna a ni a, a dang chu Mizo mipuite hmin tura hmalakna a ni.
Hetianga hmalakna turah hian Academic lam hawi Association hrang hrangte insawm khawmin thahnemngai takin kan thawk ho ta a. Chuta thawk hote chu: North Eastern Hill University Teachers’ Association Mizoram Campus (NEHUTA MC), Mizoram College Teachers’ Association (MCTA), Mizoram Economic Association (MEA), Science Teachers’ Association (STAM), Mizo Zirlai Pawl (MZP), Post Graduate Students’ Union (PGSU) leh Joint Academic Association (JAC) te kan ni.
Central University ngiata chet lak dan (Central lama lehkha thawn dan)
1. Thawnna: PV Narasimha Rao, Prime Minister of India,
Thawn ni – 16.2.1996
Thawntute (Signatories) –
1) Dr. C. Lalkima; 2) Lalrintluanga; 3) Dr. Lianzela 4) Lalrinthanga 5) C. Lalramzauva 6) Lalchhanhima Zofa
2. Thawnna: Dr. Shankar Dayal
Sharma, President of India:
Thawn ni – 4.3.1996
Subject:- Establishment of Central University in Mizoram State.
Thawntute: 1) Lianzela, NEHUTA, Mizoram Campus; 2) Thanglura, Secy., MCTA; 3) Lalrinthanga, President, MCTA; 4) Laldawngliana, President PGSU; 5) Lalthazuala, Secy. i/c Education, MZP; 6) R. Vanlalvena, Vice President MZP; 7) H. Lalthlangliana, President STAM.
3. Thawnna: HD Deve Gowda,
Prime Minister of India;
Thawn ni – 18.6.1996.
Subject:- Establishment of Central University in Mizoram.
Thawntute:-
1) Lianzela, President, NEHUTA (MC); 2) Lalrinthanga, Joint Secy, NEHUTA (MC); 3) H. Lalthlangliana,President, STAM; 4) R Lalengmawia, Gen. Secy., STAM; 5) Thanglura, Gen. Secy., MCTA; 6)Lalrinthanga, President, MEA 7)Lalchhanhima Zofa, Chairman, Education, MZP; 8) Laldawngliana, President, PGSU; 9) Dr. C. Lalkima, Chairman, Joint Academic Association.
Central University neihna tura kan hma laknaah hian Sawrkar (Mizoram Sawrkar) rilru hneh a ngaia, a chhan chu Prime Minister-in a rawn pekah Chief Minister-in a lo ‘Yes’ tawh miau a. Tin, mipui lam State University aia Central University that zawkna hre lo, ngaihtuah ngai lo an tam a, chung mite rilru hneh (public opinion mould) a ngai a ni. Sawrkar lam, Minister leh Officer pawimawhte chuan, “Central University chu keini pawn a that zawk chu kan ring, mahse State University pek kan ni tawh a, pawisa pawh pek kan ni vek tawh a, in tlai tawh,” min ti thin. Keinin tlai a la awm lo, mipui rawn lovin barh luih kan ni a, hei hi a dik lo, theih ang angin mipui lam kan zirtir dawn, kan ti ve tlat a. Politics thilah chuan zan khat lekah pawh thil a inthlak thei tih chu kan tanna a ni. Keini tlema thil hre deuh zawk kan ngawih reng chuan nakinah thangthar hovin min dem ang kan ti. Hlawhtlin emaw hneh emaw inring ngam chiah lo mah ila kan hmalakna hi record-a dah a ni ang a, chu chu thangthar hoin an hmuh huna min dem loh nan kan ti ve fan a ni. State University duh loh (hnawl) a nihna chhan langsar deuh deuhte chu State University ding tawhten sum lama harsatna an neih thin vang leh administration leh appoinment etc.-a state politics-a luh (interference) nasat vang a ni ber.
Mizoram chhunga mipui leh sawrkar hneh beiseia kan hmalakna hi a thathnem deuh avangin paper hi a sei lutuk loh nan ‘point’ te tein ka’n dah lang ang e.
u Chanchinbua article ziak leh Mass Media hmang tangkaiin State University aia Central University that zawkzia theh darh a ni.
u TV Local Channel – Zozam Studio-ah Discussion/Pannel Discussion neiin Central University a thlanawm zawkna tar lan a ni bawk.
u Aizawl khawlai dungah poster tar a ni. Tah hian STAM hoin Coaching Class (Free a an siam) a zirlaite an tangkai hle. Anni hi Poster ziaka sem chhuaktu ber an ni.
u MZP-in Long March – Aizawl atanga Lunglei tlang dunga an neihah Leaflet/Flyer State University aia Central University a that zawkzia tar lanna (NEHU MC zirtirtute siam) an sem chhuak.
u Opposition MLA te kan lenkhung a, Assembly Session-a Central Universty bill pu lut turin kan request. Pi Biakdiki (Mrs Laldenga) ngei pawh anmahni in ngeiah ka titipui.
u Mizo Students’ Union-in Opinion Poll an siam a, hetah hian State University aia Central University duh zawktu 85% an ni.
u Sawrkar File (Confidential) atangin engtin tin emaw Pu Laldenga’n Chief Minister a nih laia Prime Minister PV Narasimha Rao hnena Central University pe tura a dilna kan la chhuak a, hei hi Central Sawrkar etc.-ah tan chhanah kan hmang tangkai viau. (He lehkha copy kan neih theih nan Dr. H.L. Malsawma a tangkai hle).
u Shillong-ah MSU-in chaw ngheia Central University nei ngei tura nawrhna (Sit in Demonstration) 10.6.1996 khan an nei. Hei hi a theih anga puanzar niin Press Release pawh siam a ni nghe nghe.
u Kum 1995 khan New Delhi-ah kum danga tih thin ang bawkin Economic Editors’ Conference buatsaih a ni a. Hetah hian a vawi khatna atan Mizoram atangin kei leh Pu Lalrinthanga (Rintea) tirh kan ni a. Conference-ah hian Central Minister hrang hrangte lo kalin ministry hnathawh Editor-te hnena an puan chhawn turin an rawn hrilh thin. Hetah hian Conference-a kalte kan duh ang sawi ve leh zawhna zawh an phal a, mahse, rampum huap thil a ni tur a ni (State mal thil a ni tur ani lo) tih a ni. Remchanna lain Minister pathum (Human Resources Development, Finance, Power & Energy Minister) hnenah Mizorama Central University ngei din tura hma la turin ka ngen ve! Central University hawn belh chungchanga Central Policy zawtin, State hrang hranga State University-in sum harsatna a neih nasat thu sawiin, Central University ngei Mizoram (State retheiah) rawn hawng turin ka ngen a ni! Opinion Poll-a 85%-in Central University an duh laia an duh loh zawk State University barh luih tlat hi thil dik a ni thei dawn em ni ka ti nghe nghe.
u Kum 2000 khan Mizo Zirlai Pawl (AMPGSU) ten Shillong-ah Central University nge tha zawk ang State University Mizoram tan tih Seminar an buatsaih a. Hetah hian Resource Person turin min sawm a, Central University a thlanawm zawk zia ka zu sawi leh bawk.
Central University ngena hma kan lak mek lai hian media lama inbeihna (Media War) tih theih mai pawh awm chang a awm. Hetih lai hian NEHU Mizoram Campus-ah Post Graduate (PG) zirna department 7 a awm ve tawh a. Zirtirtu, Zirlai leh Administrative Staff (Non Teaching Staff) eng emaw zat kan awm ve. Non Teaching Staff zingah State University neih a, tuna an dinhmun aia sanga kai chhoh beisei(?) an awm ve a. An zinga mi State University tha ti a, chanchinbua rawn ziak an awm ve thin. Hei hian Central University ngiatnaah inthurual lo niin min lantir a, a zia lo kan ti hle!
Hetia State University aia Central University that zawkzia zirtira tan kan lak sauh sauhna hian awmzia a nei ta viau a, mipui vantlangin Central University tha an tihna a hriat theih ta. Mipui mar dek politician-te pawhin chu chu an hai lova, Central sawrkarin Mizoram rawn zir chiang tura a tirh Shukla Commission hnenah Central University Mizoram sawrkarin a lo dil ve ta hial tih kan hriatin kan lawm takzet.
Hun a lo kal zel a, beisei taka kan lo thlir Central University chu pek kan ni ta, a hnuaia tarlan ang hian Central University pek chungchang chu puan a ni ta a.
Prime Minister IK Gujral-a’n May ni 22, 1997-a Vanapa Hall-a Central University Mizoram tana a puan tuma a thusawi tlem (University chungchang) chu:-
“I have considered that Central University will be set up. It is no favour to you and I think that the journey that you are covering towards progress in development, the rest of the Country must lend its hand, we must not come to the North East only when we have to meet the insurgency. We must come to the east of the Country to lend hands in development and growth. The University that will be set up here, I hope, particularly the thinking section of the society will try to add new dimensions of the University education. Please do not repeat what is taught everywhere else.We must find subjects, we must find areas of studies which are areas specified.”
Kum 1997 July 14 khan lawmthu sawina lehkha Prime Minister of India, IK Gujral hnenah kan thawn leh a. Subject-a ziah dan – ‘Sincere Gratitude over the announcement of a Central University for the People of Mizoram’ tiin.
He lehkhaa hming sign-tute chu:
1. Lalmuanpuia Punte, President, MZP
2. Dr. Lianzela, President, NEHUTA (MC)
3. Rualkhuma Hmar, Vice President, MCTA
4. Lalchhandama Tochhawn, President, STAM
5. Vanlalchhawna, Secretary, MEA
6. Dr. C. Lalkima, Chairman, Academic Association
Central University ngiata hmalak chhung hi a nghâktu tan chuan a rei mang e tih tur a ni ve! Beidawn rum rum ni pawh a awm hial thin, mahse heng hun laia beiseina thar min pea min fuihtu tangkai takte chu, a hun laia State sawrkara a fawng chelhtu thenkhat – Minister-te leh Officer eng emaw zatte kha an ni. Thil thenkhat (document) min rawlruk, information pawimawh min pek, min fuihna te kha an hlu tak zet. Post Graduate zirlai kan neih te pawh an tangkai, a then sawrkar hna thawk chunga zirlai an awm a, ualau taka thil an tih ve rem lo mah se mi dang (la zalenho) an tangkai khawp. STAM zirlai (Coaching kal mek) ho an tangkai tak zet. Academic Association-a thawk hovin tha kan thlah lova, chumi lo ho khawm a, atchilh tih mai tura tang tlat mi 3, Dr. C. Lalkima, Lalrinthanga leh paper ziaktute thawhrimna hriat reng a ni tawh ang. Ka ziah lan loh lama tan laa bei ngar ngar pawh an awm ngei ang, mahse, anni chetna lam ka hriat loh avangin tun tumah hian ka thai lang lo a ni.
Heng kan beihna zawng zawng min tihhlawhtlinsaktu Pathian hnenah lawmthu awm rawh se.
LONG LIVE MZU, GREATER DEEDS REMAIN!
Thu laknate:-
1. Prof. Capt. C. Lalkima (Retd) Biboh deuh mah se (Autobiography), Lois Bet Print & Publication, Chanmari, Aizawl.
2. Lalchungnunga, Mizoram Politics of Regionalism and National Integration, Reliance Publishing House, New Delhi, 1994.
3. Lianzela, Hmeithai Fa (Autobiography), K.L. Offset Printers, MG Road Upper Khatla.
4. Educational Consultants India Limited, Mizoram University, Detailed Project Report, March 1992.