Mizorama badminton thiam ber
|hazuali leh |hazuala
July ni 25-30, 2023 chhunga Mizoram Badminton Association (MBA) leh Bawngkawn Badminton Club (BBC) tangkawpin Bawngkawn YMA Hall-a an buatsaih MBA Official Championship Badminton Tournament 2023 – Senior chu zawh fel niin, men’s singles-ah H. Lalthazuala (Ralte Villa Badminton Club) a champion a; women’s singles-ah Abigail Lalthazuali (Saron Veng Badminton Club) a thiam ber ve thung.
He tournament-ah hian category panga – Men’s singles, Women’s singles, Mens’ doubles, Women’s doubles leh Mixed doubles-ahte inelna buatsaih niin, tarlan tawh ang khian |hazuala chu men’s singles-ah a champion a; |hazuali chu women’s singles category-ah a champion bawk.
Record siamtu |hazuala
Rawlthar kum 16 leh ni 5 leka upa, Chanmari West rawlthar H. Lalthazuala’n tournament a khel dawn tih a chian hnuin kumin championship hian ngaihven a hlawh zual nghal a; amah mai bakah phai lam badminton academy thaa awmte he tournament khel tur hian an rawn hawkhawm a; tunhnaiah national level-a result tha tak tak an neih hlawm avangin an chevel leh inkhel hmu chak an tamin, an lakah beiseina pawh a sang hle.
He’ng Mizo naupangte hian badminton ngainatute beisei ang ngei phochhuakin, tournament chhinchhiahthlak leh ngaihnawm, Mizoram badminton chanchina dai tawh lo tur an rawn thlen tir a ni.
Men’s singles category-ah player 60 zetin inelna an hmachhawn a; |hazuala’n first round atanga khel tanin, final thleng hian match ruk a khel tling a, a champion-na kawngah harsatna lian tham a tawk lo.
Final thleng tura a kalkawngah seeded no. 1 Malsawmsanga (Esha) hnehin, player tha leh thahrui ngah Lalramdinthara Pachuau a vaw thla bawk. Semi final-ah Zarzokima hneh lehin final a lut a; final-ah hian phaituala badminton zir mek ve bawk, Chanmari Shuttler Club (CSC) tana khel lai C. Lalramzauva nen intumin, straight set-in hnehna a chang leh a ni.
|hazuala hian MBA Senior ranking tournament a khelh vawikhatna a ni a, a vawikhat khelhnaah champion nghalin, MBA men’s singles champion thei naupang ber record thar a siam nghe nghe.
Kumin chhung hian under-17 cate-gory-ah national level gold medal pahnih a lo la tawh a, tunkar chhunga khelh tur MBA Official Championship Badminton Tournament 2023 – Junior a khelh zawh hnuah a training neihna Pullela Gopichand Badminton Academy (PGBA) lam a pan thla leh ang a, national level tournament lian dang hmachhawn turin a inbuatsaih chho zel dawn a ni.
Final-a a tumpui Durtlang rawlthar Ramzauva pawh hian final thleng tura a kalkawngah seeded no 3, Joseph VL Ringngheta leh seeded no 5 Laldintluanga Tlau a hneh a; semi-final match-ah a nau C. Lalramsanga nen intumin, inhnehtawk taka an khelh hnuah damlohna avangin Ramsanga hi a retire a, a u zawk hian final a luh phah ta a ni.
Ramzauva hi tun tournament-a category pahniha final lut thei player palite zing ami a ni nghe nghe.
Double champion Abigail-i leh Jojo-a
Tournament lianah category pahniha champion kawp theih hi thil harsa tak a nih laiin tun tournament-ah hian Abigail Lalthazuali (SBC) leh Joseph VL Ringngheta (CSC)-te chuan hei hi an ti thei tlat!
Saron Veng tlei-rawl Abi-i hian women’s singles final-ah Lalrinhlui, Saron Veng tho, Ralte Villa Badminton Club tana khel chu 21-18, 22-20-a hnehin a champion a, mixed doubles-ah Joseph VL Ringngheta nen tangdunin, player tawnhriat ngah tawh Lalbiaksanga (Mizoram Police BC) leh Lalduhzuali (Durtlang BC) thawkdun chu deciding game-ah 15-21, 21-16, 21-11-a hnehin champion no mawi pahnihna a chawi haw a; women’s singles category-ah phei chuan Abigail-i hi vawithum a zawna a champion-na a ni ta a, tunhnaiah amah hneh thei an awm lo.
|hazuali hian tunah Oxford Higher Secondary School, Electric Vengah pawl 12 a zir mek a, amah duhsak thintu an school zirtirtute chungah lawmthu a sawi.
Kulikawn tlang-val Joseph VL Ringngheta (Jojo-a) pawh hian mixed doubles bakah men’s doubles final lutin, hnehna a chang ve ve a, double champion a ni.
Doubles inelna a hmuhnawm
Men’s doubles final inkhel hmuhnawm takah Lalramzauva (Durtlang) leh Joseph VL Ringngheta (Kulikawn), CSC tana khel mek leh he tournament-a seeded no 2 ni bawkte chuan seeded no 1 inkawp Lalrin-awma (Bungkawn) leh Laldintluanga Tlau (Republic Vengthlang), Bawngkawn Badminton Club tana khel chu 16-21, 21-15, 21-14-a hnehin an champion.
He inkhel hi a hmuhnawmin, chak tur zawk hriat mai pawh a harsa hle a; Rinawmate thiandunin first game la hmasain, second game-ah pawh hma an hruai hman viau a; Ramzauvate thiandunin tha thlah duh mai bik loin ropui takin an rawn come-back a, second game lain, deciding game-ah pawh a chungnung zawk an nih chhunzawm ta a ni.
Rinawma leh Dindinate tangdun hian player tawnhriat nei tha leh hun rei tak Mizoram badminton-a roreltu Lalmuan-awma leh Samuel Lalnunmawia (MPBC)-te tangdun chu semi-final-ah an hneh a, second round-ah district level tournament-a an hneh tawh loh Subham Yadav leh Steven Lalhriatpuia inkawp an hneh bawk.
Ramzauva leh Jojo-a te hian semi-final-ah Malsawmhlua (Ralte Villa BC) leh Mano Malsawmdawngliana (BBC) thawkrun, player naupang leh hmabak nei eng takte chu an hneh ve bawk.
Women’s doubles-ah seeded number 1 Lalrinhlui leh Zothansangi (Ralte Villa BC)-te inkawp chuan seeded no 3, Lal-venhimi (Chaltlang BC) leh Ramngaihzuali (Ralte villa BC)-te inkawp chu 21-18, 21-19-a hnehin an champion bawk a ni.
Mizorama badminton thiam ber Thazuali leh |hazuala
