Mizoram infiamna huanga inelna buatsaih tawha hlut hlawh rawn ber zinga mi, mi sang chuang entu leh tawiawmtu punkhawm theih deuh rengna SRM Institute of Science & Technology
14th Inter School Basketball Championship 2024 chu September ni 30 khan R. Dengthuama Multipurpose Hall, Salem vengah a hmawr bawk fel a ni.
He intihsiaknaah hian school 49 telin, team 95 an ni. (Sikul pakhatin team pathumte an nei thei hial) Player 1,425 zet an inlan thei bawk. Primary, Middle, High School, Higher Secondary zirlai mipa leh hmeichhia bik open intihsiakna hi ni 22 chhung neih a ni.
Zirna in tha kan neih hoin he inelna hi an ngaithutakin an hlut a, an sikul team leh zirlai an rawn thawkchhuak tha thin hle. Rualelna leh paukhauhna, intawiawmna tha leh thahnemngaihna infawkkhawm duhthusam kan hmu.
Zirlai tha za rual, sikula kumtluana inkhungkhawm ngawt lam hi kan zirna in neih that hote lunglenna lam a ni lo va, hetiang inelna phurawm boruak tem chung hian result tha nen academic session an khar ziah thin tih hretu chu mipui kan ni.
Zirlai inkhel thiam falin zirna senso a thlawnin an dawng ta fur, rahbi a dik chho zel e. R. Dengthuama Hall lam hawi teh ang.
Mizoram zirna in zawng zawngah sea level atang chauh lo paw’n Mt. Carmel School an sang ber – Carmel tlangah.
Open girls, mipa high school leh HSS nomawi pathum thawt an hawn – intihtheihpui tham a ni.
Carmel hian kumina an elpui ber St. Joseph chu HS huang final leh HSS final-ah an hneh ve ve a, pakhatna hlutzia leh nawmzia hi kum tam tak chhung an sawi leh thin ang.
St. Joseph lam erawhin thapui nena Carmel chunga nomawi hum an cha zia tur hi an titi pui ber a ni rih thung ang!
Graceland School-in Middle school zinga tha ber nihna an hauh a – champion trophy hum nawn hmasa ber an ni. Tin, Primary School-ah pawh nomawi an chawi bawk.
Hmeichhe lam inelnaah hian St. Pauls chu Mt. Carmel tleirawlte’n an hneh cheu.
Mizorama basketball inelna sang ber, MSL-a coach record nei tha ber, tum 4 nomawi chawi tawh Dawrpui tlangval Afela bakah a thawhpui Puitea, Kanan leh Dawrpui Vengthar val Nunate’n an player-te an hrechiang a – second 6 chauh awm tawha St. Joseph High School team defense Mt. Carmel lamin final-a an thiahdarh dante kha an zirlaite titi zui reng tawh tur a ni.
A khirhkhan poh leh coach tha leh player tha zia a langsar tawh thin.
Inter school basketball inelna zinga nghahhlelhawm ber, Higher lam inkhel boruak sanzia kha, supporter au hla inchhawn nung leh khuang ri dum dumte kha European football club hrawlho au hla leh an thawm ri ang mai a ni. Khatianga supporter au hla mumal nei kha Mizoram chhunga infiamna huang dangah pawh kan hre khat hle.
Inelna chimchin sanna ber HSS lamah hian Mt. Carmel leh St. Joseph bawkin champion nomawi chawi ngei tumin an innawrtawn leh zak zak a, match official lam dawhtheihzia a lang – MBBA hnuaia referee-te hian hma an sawn takzet, match an kaihhruai hnemna rah a lang chho a, an thalai seng sawng hle bawk.
Player langsar khel tha bawk Mt. Carmel lamah an awm thuau. Tharum ngah Lalo-a bakah chakpui tham talent kawl thiau – Rinchhana, Ofi-a, Pipi-a leh Fakzualte’n team game khelh hlawkzia hriain mimal anga chetthat fal an tum lo va, an Principal pawh a nui var var – Pu Makunga hi Mizo pa taka a zirlai hluite chhiat that thlenga tawiawm zat zat thin a ni.
St. Joseph Principal pawh a tang tih a hriat a, a nauteho bench player-te thutna kiangah a ding ngal.
St. Joseph hian Samuel-a thluak leh Ruatfela chet ran zia te, Duhawma thahrui leh Stephen-a thiamna kha an theihnghilh mai mai lo tawp ang.
Inter School Basketball 2024-ah chuan Mt. Carmel School chetthatna chanchinin kan khar rih a ngai a ni ta ber e.
Mizorama basketball thiam ber sikul Mt. Carmel School
