State dang atanga Mizoram kalpawhna kawngpui chhia siamthat chak tawk loh vanga lungawiloten High Court an punna chu ngaihtuah zui atan pawm belh zel a ni a. High Court-ah kawngpui chhia chai chhoh a ni dawn.
Mizoram Truck Owners Asscociation (MTOA) in Mizoram chak lakna kawngpui chhe nasa lutuk avanga mipui tawrhna thleng chungchanga public interest litigation (PIL) a thehluh chu Ningani khan Gauhati High Court-in a pawm a, sawrkar chu insawifiah turin kar li chhung hun a pe.
MTOA zualkona hi national highway pathum – Vairengte leh Sairang inkar kawng bakah Mamit leh Kanhmun lam kawng hrang hrang leh Lunglei leh Tlabung inkar a ni a. A tam zawk hi NHIDCL enkawl niin, state PWD enkawl a awm bawk tih thu dawn a ni.
Hemi hma hian Mizoram Truck Drivers Association (MTDA)-in Gauhati High Court Aizawl Bench-ah PIL an lo thehlut tawh a, kumin July 17 khan High Court hian ngaihtuah zui turin a lo pawm tawh a ni. An ni hi chuan NH-306 leh NH-06 kawngpui bikah PIL hi an thehlut a, NH 302 a tel lo nia sawi a ni.
Association pahnihin PIL an thehluhah hian kawngpui chhia avanga nitin mamawh phurhluh kawnga harsatna an tawh hrang hrang an thlen a ni.
Mizorama kawngpui chhia High Court-ah luh belh zel
