Ram chhung hmun dang rualin Nilaini khan Mizoram pumah Faina Ni – Swachhata Diwas hman a ni a. Aizawlah chuan UD&PA department leh PHE department tangdun buatsaiha hman niin, larsap Indra Sena Reddy Nallu chuan a hmanpui a. Hemi puala Cultural Fest buatsaih a hawng.Prime minister ruahmana ram pum huap faina kawnga hmalakna kalpui chu, hetiang lam hawi khawvel huapa hmalakna lian ber a ni tih larsap hian a sawi a. Faina chu kawng engkima nunpuiin, mimal, pawnlam leh chhungril nun bakah khawtlang huapa kalpui a tul tih a sawi. Mizoten faina an nunpui nia a hriat thu leh a tak ngeia a hmuh dan bakah faina hnatlangpui neih a ni thin chu ropui a tih thu a sawi a. India ram hmun dang tana entawntlak nih tum zel turin a fuih.
Faina kawnga beihpui thlak kum 10-na hmel hmu ta, Swach Bharat Mission chu kan zavaia tanrualna avanga hlawhtling a ni, tiin, “Faina kawnga hmalakna hian India rama hmeichhiate dinhmun, hriselna leh nunphung a chawikang nasa a. Faina hi tun mai ni lo, kan nitin nun leh tih dan phunga kan lakluh a ngai a ni,” Indra Sena Reddy Nallu hian a ti.
Mizoramah khawpui leh thingtlang lamah nung taka Swachhata Hi Seva campaign kalpui a ni leh mipuiin hluta faina kawnga phur taka an pen chhuak chu lawmawm a tih thu sawiin, hemi kaihhnawih department ho hmalakna fakawm a tih thu a sawi a ni.
Swachhata Hi Seva 2024 State Steering Committee chairman, chief secretary Dr Renu Sharma chuan fai tura hmalakna chu sawrkar department chauh niloin, kan zavai tanrualna tur zawk a ni tih a sawi a. Kumina faina beihpui thlak chhungin programme hrang hrang 500 dawn buatsaih niin, mi 10000 chuang an tel tih a sawi a ni.
Kum 10 kalta chhunga Mizorama Swachh Bharat Mission kalpui dan tlangpui leh Swachhata Hi Seva 2024 hman dan video enho a ni a. Larsap hian Swachhata Hi Seva 2024 hnuaia intihsiak lawmman a sem bakah faina kawnga hmalatu Safai Mitra-te chawimawina thilpek a hlan a, Swachhata Diwas puala waste to art sculpture leh street food stall siamte a fangkual bawk.
Swachhata Hi Seva puala lawmman dawngtute:
* Waste to Art Sculpture competition (high school & higher secondary school 10 atangin mi 34 an tel)
1-na Romuanpuii Ralte (class-IX A) Mt. Carmel School (Rs 35000 + certificate)
2-na Grace Lalrinmawii (class-X ‘A’) St. Pauls HSS (Rs 20000 + certificate)
3-na Aizawl Christian Academy (Rs 15000 + certificate)
* College Level Swachhata competition
1-na Pachhunga University College (Rs 35000 + certificate)
2-na Govt. Zirtiri RS College (Rs 20000 + certificate)
3-na Govt. Aizawl College (Rs 15000 + certificate)
* SBM-G hnuaia SHS 2024 activity hrang hranga titha
1-na Sesawng (Rs 5000 + citation)
2-na Thingsul Tlangnuam (Rs 3000 + citation)
3-na Kepran (Rs 2000 + citation)
* Street sweeper (Safai Mitra) thawk tha mi 5 – Laithangi, Zuangtui; Chawnghmingthanga, Bethlehem; Lalbiaknungi, Tuikual; Zothangpuii, Zonuam leh B Lalrinkunga, Bungkawn te hnenah chawimawina thilpek hlan a ni.