un hnaiah Mizoram dep Myanmar hmun \henkhatah Myanmar sipaite leh anmahni dodaltute an inkap nasa a, Myanmar sipai 40 chuang Mizoramah an tlanchhia.Tun hnai inkahna avang hian raltlan pawh an pung leh a, Champhai district-a Zokhawthar-ah raltlang chhungkaw 1000 chuang an lut thar.
Chawlhni zan atang khan Zokhawthar ral lehlam Myanmar lam, Khawmawi leh a chhehvelah Myanmar sipaite leh anmahni dotu sipaite nasa takin an inkap a, a tuk Thawhtanni zan dar 7 vel thleng an inkap. He inkahnaa tel Myanmar sipaite chu Mizoramah an tlanchhia a ni.
Zokhawthar atanga thu dawn danin, Thawhtanni khan Myanmar sipai 39 chu Zokhawthar-ah an tlan lut a, an zinga mi pathum pali vel chuan hliam an tuar. Thawhlehni khan Zokhawthar-ah bawk hian Myanmar sipai pali an tlan lut leh.
Mizorama tlan lut Myanmar sipaite hi Zokhawthar atang hian hmun dangah dah nghal an ni a, India sorkar a rawn inrawlh tih thu dawn a ni.
Thawhlehni khan Champhai district-a Hnahlan-ah Indian Air Force helicopter vawi li vel a tum tih thu dawn a ni a, Myanmar sipai tlanchhiate an phur em tih erawh hriat a ni lo.
Zokhawthar bul hnai Myanmar-a Zo hnahthlakte chu Thawhtanni khan Zokhawtharah an raltlan nghal a, Myanmar-a Khawmawi, Rihkhawdar leh Lianhna khaw thar mipui tam zawk chu Zokhawtharah hian an lut tih thu dawn a ni.
Zokhawthar VC president Lalmuanpuia chuan raltlan lut thar hi an zat chiah hriat a nih rih loh thu leh, chhungkaw 2000 dawn an nih thu te The Aizawl Post a hrilh.
Chhungkhat leh thiante bel an awm a, hall remchangah an awmkhawm bawk. Khawtlang mipuiin an ei tur an ngaihtuah a, nula leh tlangvalin eirawng an bawlsak a ni.
Zokhawthar VC president sawi danin, an khuaah hian raltlan hi mi 6500 vel an awm sa a, kar hmasa lam khan chhungkaw 100 vel an luh belh. Kar hmasaa lutte hi Tahan leh a chhehvela mite an ni a, Chawlhni zana an inkah hnuah chhungkaw engemaw zat an lut thar leh a ni.
Mizoramah Myanmar sipai tlan lut Mizoramah raltlan pung leh
