State dang atanga buhfai lei ngai loin Mizoram atanga kan tharchhuah hmangin kan intodelh thei tih, ram thatna duhtu intelkhawm pawl – Rorelna Dik Duhtute chuan an sawi a. An zirchianna atangin Mamit leh Kolasib district atang ringawt pawhin buh quintal nuai 16 chuang kan thar thei niin an sawi.
India rama state 15-ten kum 2015-a sawrkar laipui nen thawhhhona thuthlung (MoU) an ziahah, Decentralized Procurement Scheme an lo kalpui tawhna chu a awhawmin tih Rorelna Dik Duhtute intite hian an sawi a. He scheme hi Mizoram chief minister-in nikum lamah file-in lo ziak tawh mah se, a hlawhtlinna hmuh tur a awm lo tih an sawi.
Mizoram MP Pu K Vanlalvena chuan Mizorama loneitute hamthatna leh hlawkna neih theihna’n te, mipuiin buhfai thar zawk kan eia kan taksa tan pawh thatna a nih beiseiin sawrkar laipuiah a thlen a. Sawrkar laipui hian kan state sawrkar hnenah centre nen MoU ziak a, kan state chhung ami buhhum lei a, minimum support price hman mek anga anmahni ah allotment kan hmuh ang chu a man hmuhlet (re-imburse) theih turin kumin April 12 khan lehkha an rawn thawnlet a, a hlawhtlinna hmuh tur erawh a awm lo tih an sawi.
Buh seng hun a hnai tawh nen, he hun tha hi Mizoramin a chan mai an hlauh avangin awmze nei zawka hma la thei tura an ngaih Central YMA leh Mizoram Synod Social Front hruaitute nen indawrin an sawiho tawh tih an sawi bawk.
Mizoramin buhfai intodelh thei
