Halpuah leh halmawi khuahkhirhna dan thar, ‘The Mizoram Fireworks Regulation Act 2026’ kalpui dan turah tunhnai khan home minister kaihhruaiin inrawnkhawm a ni a. He hunah hian sawrkar lam mi pawimawhte bakah CYMA, AMC leh MiMA aiawhte pawh an tel a. Krismas vuakvet hmaa halpuah leh halmawi lut tur dan kawnga Mizoram Merchant Association nen tang hoa hmalak dan tur pawh sawiho a ni bawk.
Krismas leh Kumthar vuakveta halpuah leh a kaihhnawihte hal lo tura inngenna hi kum tin Krismas leh kumthar hmain tihchhuah a ni thin a; mahse, awmzia a nei thei lo. Tunah phei chuan halpuah regulation act hial kan neih phah ta a nih hi!
Aizawlah chuan traffic rules hi lirthei khalhtuten an zawm tha em em a, khualzinte pawhin mak an ti a, hahipin an sawi a, India ramah thuawih thanin kan thang chhuak chu a ni deuh ber tawh. Eng tin nge pawn lam mite hian min hmuh? “Most Disciplined City”, “Rest of India should learn from Mizoram”, “Civic sense in action – Mizoram inspires India” tih te a ni a, a dang pawh a tam mai! Urban Mobility India 2025-ah pawh “Special Award for Traffic Management” kan dawng hial a nih kha! Hetah hi chuan ‘Thu-awih Hnam’ kan nih hmel!
A hnam ang zawngin kan han ti hluai a, halpuah chungchangah chuan, halpuah hal lui ngar ngarte hi mi sing khat pawh ni se, Mizoram population nen khaikhin ralah chuan one per cent pawh an tling lo. Halpuah hi a thawm a nat em avangin mi pakhatin a hal pawh hi mi sing tam tak tibuaitu a ni ve thung. Chutiang zawnga chhut chuan, mi pakhatin midang a tihbuai per cent chu a sâng leh em em thung ang!
A nih leh faina leh thianghlimna lamah ve thung hian le? Pawl hrang hrangin faina hnatlang kan nei a, kohhran te, sawrkar department te, khawtlang leh Veng hrang hrang ang te pawhin faina hnatlang hi chu ‘Mizote hna ber’ emaw tih turin kan uar khawp mai. A lang thei chin hi chu a fài deuh vûk tawh rêng a nih hi! A lang lo lam erawh sawi lo mai ila. A nih leh, engati nge chutianga ngawrh em em maia kan hnatlan luih luih thin? Thu kan awih loh vang a ni mai lo maw?
Hnatlan reng ngaia kan awm hi eng ‘civic sense’ nge ni ta ang? Traffic rules kan zawm that chhan hi kawng a zim vang nge kan civic sense hi a lo tha ve hrim hrim?
Eng pawh ni se, a hnam ang zawnga lak chuan, Mizote hi thuawih thei tak, tih nuam tak, thil tha duh, midang tana inpe zo tak, huaisen leh rinawm kan ni. Heng zawng zawng nihna kalh (opposite) zawnga khawsa mi tlemtê te hian hnam hmel an tichhe thin em atin a ni. Chung mi tlemtê te chu a tam zawkte hian engati nge kan hneh theih tlat loh thin tih hi zawhna a ni nghal awm e.
Eng pawh ni se, thuawih hnamah inpuang ila, thuawih lote thuhnuaiah kun tum lo bawk ila, a fel a ni mai.
Mizote hi thu-awih hnam kan ni em?
