Mizote kan tlem a, kan tam theih nan ZPM chuan pian pun policy a nei tih an party leader Lalduhoma chuan a sawi.
Thawhlehnia ZPM Chhiahtlang Joint Group-in Chhiahtlanga hun a buatsaihah Lalduhoma chuan ruihhlo laka kan tu leh fate himna turin ZPM chuan thapui a thawh dawn a, budget pawh an ui dawn lo tih a sawi. Ruihtheihthil vangin thalai kan thi hnem a, a bikin mipa kan thi hnem hle, tiin, hemi vang bawk hian nupa inthen pawh kan tam tih a sawi bawk.
“Mizote hi kan pung chak lo hle a, hei hi ZPM chuan a ngaipawimawh hle. Pian pun policy kan nei a, fa pathum nei chinte chu kan nihlawh dawn. Zirnaah leh thildangah lawmman siam kan tum. Kan tlem lutuk a, tam lamah tan lak a ngai, kohhran ho nen hma kan la tlang dawn a ni,” a ti.
ZPM policy leh constitution-a pakhatnaa an dah chu ‘Ram rorelnaah Pathian ram lo thleng rawh se’, tih a nih thu ZPM leader hian a sawi a. ZPM kan vote hian kan ram rorelnaa Pathian ram a thlen theihna tur kan vote tihna a nih thu a sawi.
Ram rorelna tha din tur chuan candidate tha chauh niloin corruption laka fihlim ngam neih a ngai a, Pathian hnenah chutiang mi candidate tur an dil thin niin ZPM hruaitu hian a sawi bawk. Chumi piahlamah sawrkarna siam tur chuan tawng hrang hrang hmang, chi hrang hrang kan leng vek tur a ni, tih chu an ngaihdan a nih thu sawiin, “Kohhran hrang hrang pawhin hmun an chang tur a ni a, mipui movement a nih angin mitin huapzo thei ang berin kan kal,” a ti.
Mizote kan tam theihna tur ZPM-in policy a nei – Lalduhoma
